اقتوبەدە قازاق حاندىعىنىڭ 550 جىلدىعىنا ارنالعان سالتاناتتى شارالار ءوتىپ جاتىر - فوتو
اقتوبەگە ەلدىڭ كوپتەگەن ايماقتارى مەن رەسەيدەن قوناقتار كەلدى.
كىشى ءجۇزدىڭ حانى، قازاق حاندىعىنىڭ جوعارعى باس قولباسشىسىنىڭ ەسكەرتكىشىنە وبلىس اكىمى بەردىبەك ساپاربايەۆ پەن وبلىستىق ءماسليحاتتىڭ حاتشىسى ءسانيا قالدىعۇلوۆا، وبلىستاردان كەلگەن دەلەگاتسيالاردىڭ باسشىلارى، مەملەكەتتىك ورگانداردىڭ وكىلدەرى، دەپۋتاتتار، شىعارماشىلىق زيالى قاۋىم، ءابىلقايىر حاننىڭ ۇرپاقتارى، ستۋدەنتتەر، مەكتەپ وقۋشىلارى گۇل شوقتارىن قويدى.
سونداي- اق بۇگىن اقتوبەدە قولدانبالى ونەر شەبەرلەرىنىڭ «ۇلى دالا ناقىشتارى» اتتى حالىقارالىق جارمەڭكەسى، ايماقتىق تۋريستىك كورمە، «اقتوبە وبلىسىنىڭ حالىق ساۋلەتشىلىگىنىڭ اتاقتى ەسكەرتكىشتەرى» فوتوكورمەسى، «بابادان قالعان بايتاعىم» ايماقتىق اقىندار ايتىسى، «قازاق حاندىعىنىڭ دامۋى: وقيعالار، تۇلعالار» حالىقارالىق عىلىمي كونفەرەنسياسى وتەدى. كەشكە سايرام شايقاسىنىڭ قاتىسۋشىسى تىلەۋ ايت ۇلى باتىرعا ارنالعان ەسكەرتكىشتىڭ اشىلۋ سالتاناتى وتەدى.
ەرتەڭ ەكى اپتاعا سوزىلاتىن سالتاناتتاردىڭ باستى وقيعاسى - ايتەكە بي اۋدانىندا ءابىلقايىر حان جەرلەنگەن «حان مولاسى» ورتاعاسىرلىق قورىمدا وعان مەموريالدىق كەشەننىڭ اشىلۋى كۇتىلۋدە. كەشەن كەسەنە مەن قازاقتىڭ ءۇش ءجۇزىن بەينەلەيتىن ءۇش تۋ تۇرىندەگى ستەللادان تۇرادى. تۋلاردا بۇكىل قازاق رۋلارىنىڭ تامعالارى باسىلعان. تولىباي اۋىلىندا حان مۇراجايى اشىلادى.
ەرتەڭ ايتەكە بي اۋدانىندا ءتۇرلى شارالار: فولكلورلىق انسامبلدەردىڭ فەستيۆالى، كونسەرتتەر، ايتىس، ات سپورتى جانە حالىق جارىستارىنىڭ باسقا دا تۇرلەرى ۇيىمداستىرىلادى. 
