قازاق حاندىعىنىڭ 550 جىلدىعىنا ارنالعان موتوشەرۋ شىمكەنتكە جەتتى
الماتى قالاسىنان باستاۋ العان ساپار قازاقستاننىڭ بارلىق قالالارىندا جالعاسقان.
موتوشەرۋشىلەر 29- تامىزدا الماتى قالاسىنان شىققان. شەرۋ شامامەن 45 كۇنگە سوزىلىپ، تاراز قالاسىندا اياقتالادى.
جامبىل وبلىسىندا موتوشەرۋگە قاتىسۋشىلاردى جامبىل وبلىسىنىڭ جۋالى اۋدانى مەن وڭتۇستىك قازاقستان وبلىسىنىڭ شەكاراسىندا كۇتىپ الادى. موتوشەرۋدى باستاپ كەلە جاتقان دميتري پەترۋحيننىڭ ايتۋىنشا، بايكەرلەر وسىلاي ەل تاريحىنداعى ەلەۋلى وقيعانىڭ جوعارى دارەجەدە اتالىپ وتىلۋىنە ءوز ۇلەستەرىن قوسپاق.
موتوشەرۋدەن باسقا بايكەرلەر قالانىڭ ورتالىق كوشەسىندە وتەتىن «ءبىز - ۇلى دالا ۇرپاقتارىمىز!» جاستار اكسياسىنا قاتىسادى. سونداي-اق «ەۋرازيا بارىسى» ۇلتتىق قازاق كۇرەسى بويىنشا حالىقارالىق تۋرنيردى، ءتۇرلى سپورتتىق سايىستاردى تاماشالايدى.
ەستەرىڭىزگە سالا كەتەيىك، قازاق حاندىعىنىڭ 550 جىلدىعىن اتاپ ءوتۋ بيىل ەلىمىزدىڭ بۇكىل ايماقتارىندا ءوتىپ جاتىر. 550 جىل بۇرىن جامبىل وبلىسىنداعى تالاس جانە شۋ وزەندەرىنىڭ اراسىندا كەرەي مەن جانىبەك سۇلتاندار قازاق حاندىعىنىڭ نەگىزىن قالاعان جەردە ماڭىزدى شارالار بولىپ وتەدى. ولاردىڭ اراسىندا تەاترلاندىرىلعان كورىنىس، «ماڭگىلىك ەل» اتتى رەسپۋبليكالىق اقىندار ايتىسى، «قازاق حاندىعىنىڭ قۇرىلۋى جانە تاريحى» كىتابىنىڭ تۇساۋكەسەرى، «تاراز - عاسىرلار كۋاسى» كورمەسى، ق ر پرەزيدەنتىنىڭ جۇلدەسى ويناتىلاتىن قازاقشا كۇرەس بويىنشا «ەۋرازيا بارىسى» حالىقارالىق جارىسى بار.
بۇدان باسقا، تارازدا «ەجەلگى تاراز» جوباسى ىسكە اسىرىلۋدا، «قازاق حاندىعىنىڭ 550 جىلدىعى» ەسكەرتكىشى اشىلادى جانە قىتايلىق شيان قالاسىنان ۇلى جىبەك جولى باعدارىمەن كەلە جاتقان كەرۋەن ەكسپەديتسياسىنىڭ قاتىسۋشىلارىمەن كەزدەسۋ بولىپ وتەدى.
