قازاق حاندىعىنىڭ 550 جىلدىعى مەرەيتويىنا وراي تارازدا «ۇلى دالا ويىندارى» وتەدى
بۇل تۋرالى بۇگىن ارنايى باسپا ءسوز ءماسليحاتى بارىسىندا ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان ءمالىم ەتتى.
«قازاق حاندىعىنىڭ 550 جىلدىعىنا وراي، تاعى ءبىر شارانى وتكىزۋگە بىلەك سىبانا كىرىستىك. ول - تاراز شاھارىنىڭ ورتالىق ات شابارىندا وتەتىن «ۇلى دالا ويىندارى». وزدەرىڭىز بىلەسىزدەر، مەملەكەت باسشىسى نۇرسۇلتان نازاربايەۆ ءبىر سوزىندە: «ءار ەلدىڭ ءوز ەرەكشەلىگى بولادى، جاپونيانى «كۇن شىعىس ەلى» دەيدى، قىتايدى «اسپان استى ەلى» دەپ جاتادى. سول سياقتى، ەۋرازيانىڭ دالاسىن جايلاعان ۇلان- عايىر دالاعا «ۇلى دالا ەلى» دەگەن اتاۋ لايىق»، - دەگەن بولاتىن. راسىمەن دە، ءبىز ۇلى دالانىڭ مۇراگەرلەرىمىز. سوندىقتان، تاراز قالاسىندا 8-9 - قازان كۇندەرى قازاق حاندىعىنىڭ 550 جىلدىعىنا وراي، ۇلى دالانىڭ ويىندارىن وتكىزبەكپىز»، - دەيدى ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان.
ونىڭ حابارلاۋىنشا، «ۇلى دالا ويىندارى» باسەكەسىنىڭ اياسىندا دامىپ جاتقان ۇلتتىق ويىن تۇرلەرىنىڭ بارلىعى سالتانات قۇرادى. جانە بۇل شارا مەملەكەتتىك بيۋدجەت تاراپىنان ەمەس، تەك دەمەۋشىلەردىڭ قارجىسىنا ۇيىمداستىرىلىپ وتىر ەكەن.
«كوكپاردان ازيا چەمپيوناتىن وتكىزگەن ءبىرىنشى ەل - قازاقستان، اۋدارىسپاق پەن تەڭگە ىلۋدەن ازيا چەمپيوناتىن ءبىرىنشى وتكىزگەن ەل دە قازاقستان، ازيا بويىنشا اساۋ ۇيرەتۋدى رەسمي قولداعان دا قازاقستان. سوندىقتان، ەندى وسى جەتىستىگىمىزدىڭ بارلىعىن وسىنداي تويدا كورسەتپەسەك، قاشان كورسەتەمىز؟! ات شاپقاندا ارقاسى قوزبايتىن قازاق جوق. ۇلى دالا ويىندارى اياسىندا جاقىن بايگە، الامان بايگە، ۇشقىر بايگە وتەدى. سونىمەن قاتار، ەل اراسىندا اتى ايتىلعانمەن، زاتى جويىلىپ بارا جاتقان جامبى اتۋ جارىسىن ارنايى وسى ۇلى دالا ويىندارىنىڭ قاتارىنا قوسىپ وتىرمىز. سوندىقتان، كورەرمەن ات ۇستىندە شاۋىپ كەلە جاتىپ، ساداق اتۋ ونەرىن تاماشالاي الادى»، - دەيدى ب. تىلەۋحان.
اۆتور: كەنجەكەي توقتامۇرات قىزى
