ءابىش كەكىلبايەۆ: 550 جىل بۇرىن دەربەس ەل بولعان قازاق ەلىنىڭ ەندىگى كەلەشەگى كەمەل

استانا. قازاقپارات - 550 جىل بۇرىن دەربەس ەل بولعان قازاق ەلىنىڭ ەندىگى كەلەشەگى كەمەل.

بۇگىن استاناداعى تاۋەلسىزدىك سارايىندا ءوتىپ جاتقان قازاق حاندىعىنىڭ 550 جىلدىعىنا ارنالاعان سالتاناتتى شاراعا وراي قازاقپارات تىلشىسىنە ءوز پىكىرىن بىلدىرگەن ق ر ەڭبەك ەرى، قازاقستاننىڭ حالىق جازۋشىسى، مەملەكەت جانە قوعام قايراتكەرى ءابىش كەكىلبايەۆ وسىلاي دەدى.

 «بۇگىنگى توي - ەرەكشە توي. قازاقتىڭ باسىنان جاقسى دا، جامان دا ءوتتى. بۇدان 550 جىل بۇرىن ءوز الدىمىزعا دەربەس ەل بولدىق. سودان بەرى قاراي ەدىل مەن التايدىڭ اراسىن، سولتۇستىكتەن قۇمدىكول، وڭتۇستىكتە مىرزاشولگە دەيىنگى يەن دالانى جايلايمىز. ءبىزدىڭ وسى داۋىرگە جەتكەنىمىز دە، جەتپەگەنىمىز دە بار. جەر بەتىندەگى حالىقتىڭ قاي- قايسىسىنىڭ باسىندا كۇي مۇنداي ەمەس. «بىرەۋدى كورىپ شۇكىر ەت، بىرەۋدى كورىپ پىكىر ەت» دەگەن. قۇدايعا شۇكىر قازاق حالقىنىڭ باسىندا شۇكىرشىلىك ەتەتىن جاعداي جەتكىلىكتى»، - دەدى ءابىش كەكىلبايەۆ.

ءسوز اراسىندا ءابىش كەكىلبايەۆ قازاقستاننىڭ ب ۇ ۇ مۇشەسى بولعانىن، ەۋروپاداعى قاۋىپسىزدىك پەن ىنتىماقتاستىق ۇيىمىنا ءتوراعالىق ەتكەنىن، دۇنيەجۇزىلىك ساۋدا ۇيىمىنا مۇشە بولىپ، ەكسپو-2017 حالىقارالىق كورمەسى وتەتىنىنە نازار اۋداردى.

«مۇنىڭ ءبارىن وسى داۋىردە كورگەن ەل دە، كورمەگەن ەل دە بار. 550 جىل بۇرىن دەربەس ەل بولعان قازاق ەلىنىڭ كەلەشەگى كەمەل. ءبىز الدا تۇرعان بولاشاعىمىزعا ۇلكەن ۇمىتپەن قارايمىز. ونىڭ ساۋلەتتى دە كەمەل ەكەنىنە دە كوزىمىز جەتەدى. امان بولساق ءالى دە تالاي قىزىقتارعا جەتەمىز دەپ سەنەمىن»، - دەدى ءابىش كەكىلبايەۆ.

اۆتور: قانات مامەتقازى ۇلى