قازاق حاندىعىنىڭ 550 جىلدىعىن مەرەكەلەۋ ءۇشىن ەلىمىزدىڭ وڭىرلەرىنەن دەلەگاتسيالار ەلورداعا كەلدى
بارشا قازاقستاندىقتار اتالمىش تاريحي داتانى الداعى دەمالىس كۇندەرى، 11-13 - قىركۇيەكتە اتاپ وتەدى.
بۇل تۋرالى استانا قالاسى مادەنيەت باسقارماسى حابارلادى.
«قازاق ەلى» الاڭىندا 50 كيىز ءۇي تىگىلىپ، ەكى ۇلكەن ساحنا، سپورت الاڭدارى، التىباقاندار، تايقازان جانە ت. ب. ورناتىلدى. ۇيىمداستىرۋشىلار قالا تۇرعىندارى مەن قوناقتارىنىڭ نازارىنا قىزىقتى ويىن- ساۋىق جانە كونسەرتتىك باعدارلاما ۇسىنادى. اقمولا، اقتوبە، الماتى، اتىراۋ، شىعىس قازاقستان، باتىس قازاقستان، قاراعاندى، قوستاناي، قىزىلوردا، ماڭعىستاۋ، پاۆلودار، سولتۇستىك قازاقستان، وڭتۇستىك قازاقستان وبلىستارى، سونىمەن قاتار استانا مەن الماتى قالالارىنىڭ ۇزدىك شىعارماشىلىق ۇجىمدارى ءۇش كۇن بويى ءوز ونەرلەرىن ورتاعا سالادى.
ەلىمىزدىڭ ءار ءوڭىرى ۇزدىك حورەوگرافيالىق ۇجىمداردىڭ، انسامبلدەردىڭ، حالىق جانە ەسترادا ونەرى سوليستەرىنىڭ قاتىسۋىمەن وتەتىن كونسەرتتىك باعدارلامادان باسقا، كورەرمەندەر نازارىنا «قازاقستاننىڭ ەجەلگى قالالارى» بەينەتانىستىرىلىمى، «قازاق ۇلتتىق كيىمىنىڭ تاريحى ارقىلى حالىق تاريحىن جەتكىزۋ» اتتى ءسان فەستيۆالى، «سيقىرلى بي الەمى» بي فەستيۆالى، «بىرلىگىمىز جاراسقان» اتتى قازاقستان حالقى دوستىعى كونسەرتى، «عاسىرلار ءۇنى» ەتنو- كونسەرتى ۇسىنىلادى. بۇدان باسقا، ەتنواۋىلدا جەتىم بالالارعا ارنالعان ەكسكۋرسيا جانە استانالىق دارىندى جاستاردىڭ قاتىسۋىمەن كونسەرت وتكىزىلەدى.
ەتنواۋىلدا قازاق كۇرەسى، ارقان تارتۋ، توعىز قۇمالاق، بۇقا تارتىس، ارقان تارتىس، اسىق اتۋ سىندى ۇلتتىق سپورت تۇرلەرىنەن جارىستار ۇيىمداستىرىلادى. جەڭىمپازدار ديپلومدارمەن جانە باعالى سىيلىقتارمەن ماراپاتتالادى. مەرەكەلىك شارالار باعدارلاماسىنا ساندىك- قولدانبالى ونەر كورمە- جارمەڭكەلەرى، حالىق شەبەرلەرىنىڭ شەبەرلىك دارىستەرى ەنگىزىلدى.
بارلىق وبلىستاردىڭ ۇلتتىق كيىم كيگەن وكىلدەرىنىڭ شەرۋى ءۇش كۇنگە جالعاساتىن مەرەكەنىڭ كوركىن كەلتىرمەك. پاراد 12- قىركۇيەكتە ساعات 10.00-دا «قازاق ەلى» مونۋمەنتىنىڭ الدىنداعى الاڭدا وتەدى. وسى كۇنى ساعات 19:00 دا وڭىرلەردىڭ ەڭ ۇزدىك نومەرلەرى گالا- كونسەرتتە كورەرمەندەر نازارىنا ۇسىنىلادى.
