ۇلىتاۋدا قازاق حاندىعىنىڭ 550 جىلدىعىنا وراي «بۇلانتى شايقاسى» مونۋمەنتى اشىلدى - فوتو
ءوڭىر باسشىسى ن. ابدىبەكوۆ مونۋمەنتتىڭ اشىلۋ راسىمىندە بولدى.
«مونۋمەنت قازاق اسكەرلەرى جوڭعارلاردى تالقانداعان بۇلانتى وزەنىنىڭ جانىنداعى ءۇيتاس شاتقالىنا ورناتىلدى. بۇل جەڭىس باسقىنشىلاردى قازاق جەرىنەن قۋۋعا مۇمكىندىك بەردى. ۇرپاقتار ەلىن قورعاعان باتىرلاردى ماڭگى جادىندا ساقتايتىن بولادى. شايقاستى قانجىعالى قارت بوگەنباي باسقارعان. وندا ەرلىكپەن قاراكەرەي قابانباي، شاپىراشتى ناۋرىزباي، شاقشاق ۇلى جانىبەك، حانكەلدى ۇلى رايىمبەك جانە ت. ب. كوزگە تۇسكەندەر»، - دەلىنگەن حابارلامادا.
جەتى مەترلىك تاس جەز بەن ءمارماردان جاسالعان. تومەنگى جاعىندا ءتورت جاعىنان دوڭگەلەك قالقاندار ورناتىلعان. جوعارعى بولىگىندە نايزا. ەسكەرتكىشتە وتىز شاقتى باتىرلاردىڭ ەسىمى قاشالىپ جازىلعان.
ەسكەرتكىش اۆتورى - جەزقازعاندىق شاحيبابەن سەيتكەنوۆ. مونۋمەنت قۇرىلىسىنا «قازاق مىس» 7 ميلليون تەڭگە ءبولىپ، دەمەۋشىلىك جاساعان. شارا بارىسىندا كەتبۇقا ءبي ەسكەرتكىشى ورناتىلاتىن جەرگە تاس قويىلدى.
وبلىس اكىمى، باسقا دا قوناقتار جەزقازعان تاريحي- ارحەولوگيالىق مۇراجايىنا بارىپ، «قازاق حاندىعى» ەكسپوزيتسياسىمەن تانىستى.
ەسكە سالساق، ۇلىتاۋ ەتەگىندە «حابار» اگەنتتىگىنە بەرگەن سۇحباتىندا ەل پرەزيدەنتى ن. نازاربايەۆ: ء«وز تاريحىمىزدى تەرەڭىنەن ءبىلۋ ءۇشىن كوپ جۇمىس جاسايمىز. وتكەن تاريح كۋالەرىنىڭ ءبىرى - ۇلىتاۋ. بۇل جەردى بارلىعى ءبىلۋى ءتيىس» .
ۇلىتاۋدان شىققان اتاقتى ادامدار دا از ەمەس، ونىڭ ىشىندە اكادەميكتەر ءومىرحان بايقوڭىروۆ، مۇحامەدجان قاراتايەۆ، تورەگەلدى شارمانوۆ، ايتمۇحامبەت ابدۋللين جانە ارميا گەنەرالى، «حالىق قاھارمانى» مۇحتار التىنبايەۆ، جازۋشى- پۋبليتسيستەر باۋبەك بۇلقىشەۆ، مۇقان يمانجانوۆ، كامال سمايىلوۆ جانە ت. ب. بار.
