قازاق حاندىعىنىڭ 550 جىلدىعى مەرەيتويى داتاسى پاتريوتيزمدى كۇشەيتۋگە كەڭ جول اشادى - مەملەكەتتىك حاتشى
بۇل تۋرالى بۇگىن ل. ن. گۋميليەۆ اتىنداعى ە ۇ ۋ- دا «قازاق حاندىعى تۇسىنداعى حانىمدار مەن ارۋلار» اتتى رەسپۋبليكالىق عىلىمي-تاجىريبەلىك كونفەرەنتسيادا ق ر مەملەكەتتىك حاتشىسى گۇلشارا ءابدىقالىقوۆا ءمالىم ەتتى.
«كوشپەندىلەر ۇعىمىندا تىرشىلىكتىڭ باستاۋىن، ءومىردىڭ جالعاسىن ساباقتاستىرۋشى رەتىندە ايەلدەر قاۋىمى ەرەكشە قۇرمەت تۇتىلعان. ءبىز ۇلت تانىمىنا، ۇلت پاراساتىنا، ۇلت ءپالساپاسىنا وزگەنىڭ ەمەس، ءوز كوزىمىزبەن قارايتىن كەزەڭدە كوتەرىلدىك. سوندىقتان جاۋگەرشىلىك زامانداردا كىرمەنى وزەككە تەپپەگەن، كەڭەستىك كەزەڭدە قۋعىن-سۇرگىنگە ۇشىراپ، قازاق جەرىنە ايدالىپ كەلگەن ۇلتتار مەن ۇلىستاردى باۋىرىنا باسقان. سول ارقىلى ءوزىنىڭ ەرەكشە ءومىر ءسۇرۋ سالتى مەن ۇلتتىق ءداستۇرى مەن تولەرانتتىلىقتىڭ ۇلگىسىن كورسەتكەن حالقىمىزدىڭ تاماشا قاسيەتتەرىن تانىپ، ۇلت تاريحىنداعى ۇلى انالاردىڭ ۇلاعاتىن جاس ۇرپاقتىڭ ساناسىنا سىڭىرۋ ءبىز ءۇشىن كوكەيكەستى ماسەلە. وسى ۇلت ءداستۇرى دەپ اتالاتىن گەنەتيكالىق كودىمىزدىڭ باستاۋى دا، جالعاستىرۋشىسى دا ايەل انالار ەكەنى اقيقات»، - دەپ اتاپ ءوتتى گ. ءابدىقالىقوۆا.
مەملەكەتتىك حاتشى 2015-جىلى ەلباسى نۇرسۇلتان ءابىش ۇلى نازاربايەۆتىڭ تەرەڭ ساياسي شەشىمى ارقاسىندا بۇكىل ەل بولىپ اتاپ ءوتىپ جاتقان قازاق حاندىعىنىڭ 550 جىلدىعى مەرەيتويى ايتۋلى داتاسى حالىقتىڭ ۇلتتىق-تاريحي ساناسىن تەرەڭدەتۋگە جانە قازاقستاندىق پاتريوتيزمدى كۇشەيتۋگە كەڭ جول اشىپ بەرگەنىن قاداپ ايتتى.
«قازاق قىزىن قادىرلەگەن، اناسىن ارداقتاعان حالىق. ەلباسى «ايەل - وشاقتىڭ ۇيىتقىسى، التىن بەسىكتىڭ يەسى، ەل بولاشاعىنىڭ بارلىعى ايەل ازاماتشانىڭ قولىنان وتەدى» دەگەن ءسوزى ءارقاشان بارشامىز ءۇشىن ۇلكەن تاعىلىم. بۇل ءبىز مەجەلەپ وتىرعان ماڭگىلىك ەل مۇراتتارىنىڭ ايىرىقشا ءبىر باستاۋلارىنىڭ ءبىرى بولىپ سانالادى»، - دەدى ول.
ايتا كەتەيىك، اتالعان رەسپۋبليكالىق عىلىمي-تاجىريبەلىك كونفەرەنتسيانى ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا، ل. ن. گۋميليەۆ اتىنداعى ە ۇ ۋ مەن قازاقستانداعى ب ۇ ۇ دامۋ باعدارلاماسى ۇيىمداستىردى.
كونفەرەنتسياعا قاتىسۋشى عالىمدار ايعاشىم حانشا، بوپاي حانىم مەن باي انانىڭ، تويقارا حانىمنىڭ جانە قازاق حالقىنىڭ وزگە دە بەلگىلى وكىلدەرىنىڭ ەسىمدەرى جايىندا باياندامالار جاسادى.
اۆتور: رۋسلان عابباسوۆ
