تارازدا قازاق حاندىعىنىڭ 550 جىلدىعىنا تەاترلاندىرىلعان قويىلىمدار ازىرلەنىپ جاتىر - فوتو
بۇدان بۇرىن حابارلانعانداي، ق ر پرەمەر-ءمينيسترىنىڭ ورىنباسارى ب. ساپاربايەۆتىڭ جامبىل وبلىسىنداعى جۇمىس ساپارى كەزىندە تەاترلاندىرىلعان شوۋعا دايىندىق جايلى اڭگىمە بولعان ەدى.
20- مامىردا ۆيتسە-پرەمەر قازاق حاندىعىنىڭ 550 جىلدىعى مەرەكەسىنە دايىندىق جونىندەگى جوسپاردى ىسكە اسىرۋ بارىسىمەن تانىسقان بولاتىن.
ەتنوگرافيالىق-مادەني شوۋدى قويۋعا شاقىرىلعان El production company كومپانياسىنىڭ كوركەمدىك جەتەكشىسى عالىم دوسكەننىڭ سوزىنە قاراعاندا، تەاترلاندىرىلعان كورىنىستەر قازاق حالقىنىڭ مادەنيەتى مەن تۇرمىس-تىرشىلىگىن، ەركىندىك سۇيگىش قازاق حالقىنىڭ اسقاق رۋحىن كورسەتە ءبىلۋى ءتيىس.
«الدىمەن وتكەن عاسىرلاردا ءبىزدىڭ كۇشتى مەملەكەتتىك قۇرىلىمدارعا جانە جەكە سالت-داستۇرگە يە بولعاندىعىمىزدى كورسەتۋىمىز كەرەك. ۇلى جىبەك جولىندا ەجەلگى قالا تارازدىڭ العان ورنىن بەينەلەۋ قاجەت»، - دەپ اتاپ ءوتتى كومپانيانىڭ كوركەمدىك جەتەكشىسى.
بۇگىنگى تاڭدا ءالى دە سارالاي تۇسەتىن بىرنەشە ەتنوگرافيالىق-تەاترلاندىرىلعان شوۋ ازىرلەنۋدە.
ەسكە سالا كەتسەك، جامبىل وبلىسىندا 550 جىل بۇرىن تالاس پەن شۋ وزەندەرىنىڭ اراسىندا كەرەي مەن جانىبەك سۇلتاندار قازاق حاندىعىنىڭ ىرگەسىن قالاعان ەدى، وسىعان وراي اۋقىمدى شارا وتەدى. سونداي-اق قازاق حاندىعىنىڭ قۇرىلۋى جانە تاريحىنا ارنايى شىعارىلعان كىتاپتاردىڭ تۇساۋكەسەرىنەن باستالىپ، «ماڭگىلىك ەل» يدەياسى اياسىندا «قازاق حاندىعىنىڭ 550 جىلدىعىنا ارنالعان رەسپۋبليكالىق اقىندار ايتىسى، وبلىستاردىڭ مەرەكەلىك كونسەرتتىك باعدارلاماسى، قازاق كۇرەسىنەن «ەۆرازيا بارىسى» حالىقارالىق تۋرنيرى، «مەرەكەلىك تارتۋ» اكسياسى، «تاراز -عاسىرلار كۋاسى» اتتى تاريحي كورمە، «كونە تاراز» ارحەولوگيالىق پاركى مەن «ەجەلگى تاراز» مۋزەيىنىڭ، «قازاق حاندىعى» مەموريالدى مونۋمەنتىنىڭ سالتاناتتى اشىلۋ ءراسىمى وتكىزىلمەك. ەتنوقالاشىقتا تەاترلاندىرىلعان كورىنىس پەن شەرۋ ۇيىمداستىرىلادى. وعان قىتايدىڭ شيان قالاسىنان 2014-جىلدىڭ كىركۇيەگىندە شىعىپ، مەرەيتويعا ارنايى ۇشتاستىرىپ، سول كۇنى تاراز قالاسىنا كەلەتىن «ۇلى جىبەك جولىنداعى مادەنيەت» كەرۋەنىنىڭ قاتىسۋى كۇتىلۋدە.
