قازاق حاندىعىنا 550 جىل: ورالدا «تاريحي تۇلعالار: ۋاقىت جانە ءومىر جولدارى» اتتى جاڭا كىتاپ تانىستىرىلدى

None
None
ورال. قازاقپارات - 20- ناۋرىز كۇنى ع. قۇرمانعاليەۆ اتىنداعى وبلىستىق فيلارمونيا زالىندا بەلگىلى باتىس قازاقستاندىق عالىم، تاريح عىلىمدارىنىڭ دوكتورى، پروفەسسور، اكادەميك تۇياقباي رىسبەكوۆتىڭ «تاريحي تۇلعالار: ۋاقىت جانە ءومىر جولدارى» اتتى جاڭا كىتابى تانىستىرىلدى.

شارادا تاريح عىلىمدارىنىڭ كانديداتتارى جاڭابەك جاقسىعاليەۆ، سامات قۇرمانالين، ادەبيەتشى- عالىم، فيلولوگيا عىلىمدارىنىڭ كانديداتى سەرىكقالي شاراباسوۆ، م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ رەكتورى، پەداگوگيكا عىلىمدارىنىڭ دوكتورى اسحات يمانعاليەۆتىڭ اتاپ وتكەنىندەي، جيناقتا حاندار مەن باتىرلاردان باستاپ اتاقتى اقىن-جازۋشىلار، ونەر قايراتكەرلەرى، ەل باسقارعان ازاماتتاردىڭ ءومىرى مەن تۇلعا رەتىندەگى قادىر-قاسيەتتەرى جاڭاشا سارالانادى.

مىسالى، ءابىلقايىر حاننىڭ رەسەي وتارشىلدىعىنا قارسى كۇرەسى تارقاتىلىپ ايتىلعان. سونداي-اق وقىرماندار اق جايىق پەن قۇم نارىننىڭ شەجىرەسى، وسى وڭىردە ءومىر سۇرگەن تۇلعالار جونىندە كوپتەگەن قۇندى دەرەكتەردى وسى كىتاپتان تابا الادى. مۇنى قازاق حاندىعىنىڭ 550 جىلدىعىنا قوسىلعان سۇبەلى ۇلەس دەپ باعالاۋعا بولادى.

كىتاپ اۆتورى تۇياقباي رىسبەكوۆتىڭ ايتۋىنشا، تاريحتى ەشكىم دە جازىپ بىتىرە المايدى. سونىمەن قاتار ءار تۇلعاعا ءادىل باعا بەرۋ ماڭىزدى. ايتالىق، جاڭگىر حاندى كەمشىلىكتەرىن ايتپاي، اسپانعا كوتەرىپ ماقتاۋ دا نەمەسە ونى جاپپاي قارالاۋ دا دۇرىس ەمەس. بۇل رەتتە اقيقاتقا، تاريحي دەرەكتەرگە سۇيەنە وتىرىپ، سول كەزەڭنىڭ شىندىعىن بەرە ءبىلۋ كەرەك. مۇنداي ەڭبەكتەردى سەريالىق تۇردە جاريالاعان ءجون. سوندىقتان تاعى 53 تۇلعاعا بايلانىستى دەرەكتەر جيناقتالۋدا. الداعى ۋاقىتتا باسقا دا حان-باتىرلار مەن اقىندار، ونەر قايراتكەرلەرى تۋرالى كىتاپ جارىق كورەتىن بولادى.

اۆتور: ەلجان ەرالى

سوڭعى جاڭالىقتار