ءماسليحات دەپۋتاتى قازاق حاندىعىنىڭ 550 جىلدىعىنا ارناپ 550 مىڭ تەڭگەسىن بەردى - جامبىل وبلىسى

تاراز. قازاقپارات - جامبىل وبلىستىق ءماسليحاتىنىڭ كەزەكتەن تىس XXXVII سەسسياسىندا وبلىستىق بيۋدجەتكە وزگەرتۋلەر مەن تۇزەتۋ ەنگىزۋ ماسەلەسىن تالقىلاۋ بارىسىندا ۇنەمدەلگەن 1 ميلليارد تەڭگەدەن استام قاراجاتتى حالىق قالاۋلىلارى قايدا باعىتتاۋ قاجەتتىگىن تالقىلادى.

وبلىستىق ەكونوميكا جانە بيۋدجەتتى جوسپارلاۋ باسقارماسىنىڭ باسشىسى جومارت ءامىرحانوۆتىڭ سوزىنە قاراعاندا، بۇل قاراجاتتىڭ 900 ميلليون تەڭگەسى قازاق حاندىعىنىڭ 550 جىلدىعىن تويلاۋعا باعىتتالادى.

500 ميلليون تەڭگەنى «كونە تاراز» تاريحي-مادەني كەشەنىنىڭ قۇرىلىسىنا، 250 ميلليون تەڭگەنى ەتنوفەستيۆال، «ماڭگىلىك ەل» ايتىسى جانە وزگە دە مادەني-بۇقارالىق شارانى ۇيىمداستىرۋعا، 120 ميلليونى «ەۋرازيا بارىسى» تۋرنيرىن وتكىزۋگە، 30 ميلليونى اقپاراتتاندىرۋعا قوسادى.

قالعان قارجى ايماقتاعى ءبىلىم بەرۋ، دەنساۋلىق ساقتاۋ جانە سپورت سالالارىنداعى ماسەلەلەردى شەشۋگە باعىتتالماق.

سارىسۋ اۋدانىنان سايلانعان دەپۋتات اساۋباي مايلىبايەۆ قازاق حاندىعىنىڭ 550 جىلدىعىن جوعارى دەڭگەيدە اتاپ وتۋگە ۇلەس قوسۋعا شاقىرىپ، سول ءۇشىن ءوزى 550 مىڭ تەڭگە بەرەتىنىن ايتتى.

جامبىل وبلىسىنىڭ اكىمى كارىم كوكىرەكبايەۆ مۇنى جاقسى باستاما دەپ اتادى.

ەسكە سالا كەتەيىك، قازاق حاندىعىنىڭ 550 جىلدىعى بيىل ەلدىڭ بارلىق ايماقتارىندا مەرەكەلەنەدى.