تۇركيانىڭ ەكس-پرەزيدەنتىنىڭ يەلىگىنە 55 كۇزەتشى مەن 45 قىزمەتشى بەرىلدى
بۇل تۋرالى تۇركياداعى مەنشىكتى ءتىلشىمىز ەرجان ءجۇنىس جەرگىلىكتى Haber Turk گازەتىنە سىلتەمە جاساي وتىرىپ حابارلايدى. تۇركيادا ەل تىزگىنىن ۇستاعان بۇرىنعى پرەزيدەنتتەردىڭ بارلىعى زاڭعا سايكەس ءومىر بويى مەملەكەتتىڭ قامقورلىعىندا بولادى.
سوندىقتان چانكايا سارايىنان كوشكەن كەزدە ءار پرەزيدەنتكە قاۋىپسىزدىگىن قورعايتىن كۇزەتشى مەن كۇتىمىن جاسايتىن قىزمەتكەرلەر بەرىلەدى. الايدا ولاردىڭ سانى ءارتۇرلى بولۋى مۇمكىن. مىسالى ابدۋللا گۇلدەن بۇرىن مەملەكەت باسشىسى بولعان احمەت نەدجدەت سەزەر 2 كولىك پەن 16 قىزمەتكەردى قاناعات ەتسە، تۇركيانىڭ توعىزىنشى پرەزيدەنتى، تۇركى الەمىنىڭ اقساقالى سۇلەيمەن دەميرەل زەينەتكەرلىككە شىققاندا جانىنا نەبارى 6 قىزمەتكەردى الىپتى.
كەيبىر اقپارات كوزدەرى ابدۋللا گۇلمەن ونىڭ وتباسى ءالى تارابياداعى پرەزيدەنتتىك سارايدا تۇرىپ جاتقاندىعىن جانە بولاشاقتا قىزمەتكەرلەردىڭ سانى ازايۋى مۇمكىن ەكەندىگىن جەتكىزەدى.
24.kz
