ەلوردادا ءبىر پاتەرگە 548 ادام تىركەۋدە تۇرعانى انىقتالدى
نۇر-سۇلتان. قازاقپارات - ەلوردانىڭ كوشى-قون پوليتسياسى قىزمەتكەرلەرى جىل باسىنان بەرى جەدەل الدىن الۋ شارالارىن وتكىزىپ، 600 گە جۋىق «رەزەڭكە» مەكەنجايدى انىقتادى، دەپ حابارلايدى قازاقپارات ءتىلشىسى.
نۇر-سۇلتان قالالىق پوليتسيا دەپارتامەنتىنىڭ باسپا ءسوز قىزمەتىنىڭ مالىمەتىنشە، تىركەلگەن مەكەنجايدا ءىس جۇزىندە تۇرمايتىن 24 مىڭعا جۋىق ازامات تىركەۋدەن شىعارىلدى. ولاردىڭ ىشىندە اكىمشىلىك عيماراتتارعا تىركەلگەن ازاماتتار بار. ال كوشى-قون زاڭناماسىن بۇزعان تۇرعىن ۇيلەردىڭ يەلەرىنە ايىپپۇل سالىندى.
«ايتالىق، كوشى-قون قىزمەتى قىزمەتكەرلەرى ك. ازەربايەۆ كوشەسىندەگى ۇيلەردىڭ بىرىندە 2016 -جىلدان بەرى 259 ادام تۇراقتى تىركەۋگە تۇرعان پاتەردى انىقتادى. ءدال وسى پاتەردە 289 ادام ۋاقىتشا تىركەۋگە الىنعان. بۇعان قوسا، وسى جىلدىڭ تامىزىندا عانا «پىسىق ايەل» پاتەرىنە 154 ادامدى تۇراقتى تىركەۋگە قويعان. پاتەر يەسىنە قاتىستى ق ر اكىمشىلىك قۇقىق بۇزۋشىلىق كودەكسىنىڭ 493-بابىمەن اكىمشىلىك حاتتاما تولتىرىلدى. وتباسىنىڭ 4 مۇشەسىنەن باسقا بۇعان دەيىن تىركەۋگە الىنعان ادامداردىڭ بارلىعى تىركەۋدەن شىعارىلدى»، - دەدى ۆەدومستۆودان. وسىعان وراي نۇر-سۇلتان قالالىق پ د كوشى-قون قىزمەتى كوشى-قون زاڭناماسىنىڭ بۇزىلۋىنىڭ الدىن الۋ ماقساتىندا تۇرعىندارعا تۇرعىلىقتى جەرلەرىنە دەر ۋاقىتىندا تىركەلۋگە شاقىرادى.
مەكەنجاي مالىمەتتەرىندە قايشىلىق بولعان كەزدە ح ق ك و-لارداعى كوشى-قون قىزمەتىنىڭ اۋماقتىق بولىمشەلەرىنە جۇگىنۋ قاجەت. جالپى، 2020 -جىلدىڭ 9 ايىندا ەلوردادا 121 مىڭنان استام تۇراقتى جانە 30 مىڭعا جۋىق ادام ۋاقىتشا تىركەۋگە تۇردى. ستاتيستيكالىق دەرەكتەرگە سايكەس، سوڭعى 2 جىلدا اقمولا، تۇركىستان، قاراعاندى جانە شىعىس قازاقستان وبلىستارىنىڭ تۇرعىندارى ەلوردا ءجيى قونىس اۋداراتىندىعى بايقالادى.
اۆتور: مارلان جيەمباي
