جۇرەگى تاۋلىگىنە 53 رەت توقتاعان ەلوردالىق ناۋقاس امان قالدى
ءبىر تاۋلىك ىشىندە ونىڭ جۇرەگى 53 مارتە توقتاپ، قايتا سوعا باستاعان، دەپ حابارلايدى قازاقپارات.
ناۋقاس 6- قاڭتار كۇنى ميوكارد ينفاركتىسى بويىنشا جەدەل جاردەم كولىگىمەن وتە اۋىر جاعدايدا كوپبەيىندى اۋرۋحاناعا شۇعىل تۇردە جەتكىزىلدى. تۇسكەن ساتتەن كەيىن 10 مينۋت ىشىندە وعان وتا (كاروناروگرافيا جانە ستەنتتەۋ) جاسالدى.
قان اينالىمى ۇنەمى توقتاپ تۇردى. دارىگەرلەر كۇنى-ءتۇنى ناۋقاستىڭ جۇرەگىن قالپىنا كەلتىرۋمەن اينالىستى. جۇرەك قاعىسى ءبىر كۇندە 53 رەت توقتادى. جاساندى جۇرەك پەن وكپە قىزمەتىن اتقاراتىن ekmo (ەكستراكورپورالدى مەمبرانالىق وتتەگىمەن قانىقتىرۋ) قوسۋعا تۋرا كەلدى.
دارىگەرلەر 35 كۇن بويى پاتسيەنتتىڭ جانىنان كەتپەدى، تۇراقتى باقىلاۋ جۇرگىزىلدى. وسى ۋاقىت ىشىندە قان كەتۋ بولدى، سودان كەيىن قابىنۋ رەاكتسياسى، سەپسيس جانە جۇيەلىك كوپ مۇشەلىك جەتكىلىكسىزدىك پايدا بولدى.
«ناۋقاستى و دۇنيەدەن بىرنەشە رەت قايتارىپ الۋ، ونى اياققا تۇرعىزىپ قانا قويماي، دەنەنىڭ بارلىق قىزمەتىن ساقتاۋ مۇمكىن بولدى. مۇنداي وپەراتسيالاردى ءتىپتى بىرنەشە رەت جاساعان تاجىريبەلى رەانيماتولوگتار «مەديتسينالىق عاجايىپ» دەپ اتايدى»، - دەدى كارديوبيت ءبولىمىنىڭ مەڭگەرۋشىسى راسۋل ساعىنايەۆ.
«ناۋقاس امان قالدى، قۋانىشىمىزعا وراي، ميىنا زيان كەلگەن جوق. ول ءۇشىن قابىلداۋ بولمەسى دارىگەرلەرىنىڭ، ينتەرۆەنتسيالىق كارديولوگتاردىڭ، كارديوحيرۋرگتاردىڭ، كارديو بيت كەزەكشى دارىگەرلەرىنىڭ (رۋسلان قالييەۆ، قاسقىر ناۋرىز، لۋنارا قادىروۆا، ريشات ايتقالي) ، مەدبيكەلەر مەن سانيتارلاردىڭ ۇلكەن كوماندالىق جۇمىسى جاسالدى. ءبىز ءۇشىن بۇل ۇلكەن جەڭىس»، - دەپ اتاپ ءوتتى اعا كارديوورديناتور ءسابيت اينامقۇلوۆ.
قازىرگى ۋاقىتتا ناۋقاس تۇراقتى جانە ينتەرۆەنتسيالىق كارديولوگيا بولىمىنە اۋىستىرىلدى.