تۇركيادا اسكەري وپەراتسيا بارىسىندا 53 لاڭكەستىڭ كوزى جويىلدى
استانا. قازاقپارات - تۇركيادا تەررورلىق ۇيىمدارعا قارسى اسكەري وپەراتسيا جۇرگىزىلىپ جاتىر، دەپ حابارلايدى حابار 24 تەلەارناسى.
تۇرىك قارۋلى كۇشتەرى، جاندارم مەن پوليتسيانىڭ ارنايى جاساعى جۇمىلدىرىلعان كەڭ اۋقىمدى شارادا اپتا ىشىندە 53 لاڭكەستىڭ كوزى جويىلىپ، 13 ءى ۇستالعان.
بۇل دەرەكتى وسى ەلدىڭ ىشكى ىستەر مينيسترلىگى تاراتتى. ۆەدومستۆانىڭ رەسمي اقپاراتىنا سۇيەنسەك، وپەراتسيا اياسىندا «يراك جانە ليەۆانت ۇيىمى»، فەتو جانە كۇرد سودىرلارىنا قاتىسى بار دەگەن كۇدىكپەن مىڭنان اسا ادام ۇستالعان.
سونداي-اق كۇشتىك قۇرىلىمدار قولدان جاسالعان 65 بومبا، 2 توننا جارىلعىش زات پەن 77 قارۋ تاركىلەگەن.
ەستەرىڭىزگە سالامىز، بىلتىر تۇركيادا جۇزدەگەن ادامنىڭ ءومىرىن جالماعان 28 ءىرى تەررورلىق وقيعا تىركەلدى. لاڭكەستىك شابۋىل كوبىنە تۇركيانىڭ ەڭ ءىرى شاھارى ىستانبۇل مەن كۇردتەر تىعىز شوعىرلانعان ەلدىڭ شىعىس ايماعىنداعى ديارباقىر پروۆينتسياسىندا بولعان.
بۇل تەررورلىق اكتىلەردى تگيل مەن «كۇردىستان جۇمىسشى پارتياسى» ءوز موينىنا الدى.
