شەتەلگە شىعارىلعان 530 ميلليون دوللار ەلگە قايتارىلدى - ادىلەت مينيسترلىگى
ۆيتسە-ءمينيسترى ازامات امىرعاليەۆ ۆەدومستۆونىڭ كەڭەيتىلگەن القا ماجىلىسىندە وسىنداي اقپارات ايتتى، دەپ حابارلايدى قازاقپارات ءتىلشىسى.
«460 ميلليون دوللاردان استام سوماعا مەملەكەت مۇددەسى قورعالىپ، ەكى داۋ بويىنشا 530 ميلليون دوللار ەلگە قايتارىلدى»، - دەدى ۆيتسە- مينيستر.
ايتۋىنشا، ادىلەت مينيسترلىگى تاراپىنان اۆتورلىق قۇقىقپەن قورعالاتىن تۋىندىلارعا 8 مىڭنان استام كۋالىك، ال ونەركاسىپتىك مەنشىك وبەكتىلەرىنە 12 مىڭنان استام قورعاۋ قۇجاتى بەرىلگەن.
«2021 -جىلعا ارنالعان رەسپۋبليكالىق بيۋدجەتتەن مينيسترلىككە 53 ميلليارد تەڭگەدەن استام قارجى ءبولىنىپ، ول تولىعىمەن يگەرىلدى»، - دەپ تۇيىندەدى ازامات امىرعاليەۆ.
اتالمىش جيىندا سوت ورىنداۋشىلاردىڭ وندىرىسىندە جالپى كولەمى 9 تريلليون تەڭگەدەن اساتىن 6 ميلليون 760642 قۇجات بار ەكەنى ايتىلدى.
«سوت ورىنداۋشىلاردىڭ وندىرىسىندە جالپى كولەمى 9 تريلليون تەڭگەدەن اساتىن 6 ميلليون 760642 قۇجات بار. بۇل 2020 -جىلمەن سالىستىرعاندا %30 كوپ. شامامەن 300 ميلليارد تەڭگە بولاتىن 2 ميلليون 349166 قۇجات تولىق ورىندالدى. بۇل - وندىرىستەگى قۇجاتتاردىڭ %74 ى»، - دەيدى ادىلەت ءمينيسترىنىڭ ورىنباسارى ازامات امىرعاليەۆ.
ەسكە سالساق، پرەزيدەنتتىڭ قاتىسۋىمەن جاقىندا وتكەن ۇكىمەت وتىرىسىندا ەكى ايدىڭ ىشىندە قازاقستاننان شەتەلگە زاڭسىز شىعارىلعان قارجىنى قايتارۋ جونىندە ۇسىنىس ازىرلەۋ بويىنشا تاپسىرما بەرىلگەن بولاتىن.
اۆتور: ەسىمجان ناقتىباي
