20:17, 14 - قىركۇيەك 2016 | GMT +5
بيىل وڭتۇستىك قازاقستان وبلىسىندا 521 ەگىز نارەستە دۇنيەگە كەلدى
استانا. قازاقپارات - وسى جىلدىڭ سەگىز ايىندا وڭتۇستىك قازاقستان وبلىسىندا 53051 نارەستە دۇنيە ەسىگىن اشتى، ونىڭ 521 ءى ەگىز بولسا، تورتەۋى - ۇشەم.
بۇل تۋرالى وبلىس اكىمدىگىنىڭ باسپا ءسوز قىزمەتىنەن ءمالىم ەتتى.
ايتا كەتەيىك، قازاقستانداعى ءاربىر بەسىنشى بالا وڭتۇستىك قازاقستاندا ومىرگە كەلەدى. ەلىمىز تاۋەلسىزدىگىن العاننان كەيىن دەنساۋلىق ساقتاۋ سالاسىن قارجىلاندىرۋدى ارتتىرۋ ەسەبىنەن جاڭا مەديتسينالىق مەكەمەلەر سالىندى.
ماتەريالدىق-تەحنيكالىق جابدىقتاۋ جاقساردى. زاماناۋي قۇرال-جابدىقتار مەن قوندىرعىلار وبلىس ورتالىعىندا عانا ەمەس، اۋداندار مەن قالالاردا ورناتىلعان. وسىنىڭ ناتيجەسىندە، وڭىردە انا مەن بالا ءولىمى ازايىپ، تۋۋ كورسەتكىشى ارتىپ كەلەدى.
وتكەن جىلدىڭ سايكەس كەزەڭىندە وڭتۇستىك قازاقستان وبلىسىندا 52636 ءسابي دۇنيە ەسىگىن اشتى.
