08:39, 31 - شىلدە 2018 | GMT +5
فيليپپين ەلىندە تولاسسىز جاۋعان جاۋىننان كەلگەن شىعىن 52,6 ميلليون دوللاردى قۇرادى
استانا. قازاقپارات - تولاسسىز جاۋعان نوسەر جاڭبىر فيليپپين ەلىنىڭ ەكونوميكاسىن 52,6 ميلليون دوللارعا شىعىنعا وتىرعىزدى.
بۇل تۋرالى جەرگىلىكتى بۇقارالىق اقپارات قۇرالدارىنا سىلتەمە جاساپ انادولۋ اگەنتتىگى حابارلادى.
فيليپپيننىڭ تابيعي اپاتتاردىڭ قاۋپىن ازايتۋ مەن تاۋەكەلدەردى باسقارۋ جونىندەگى ۇلتتىق كەڭەسىنىڭ (NDRRMC) حابارلاۋىنشا، نوسەر جاۋىن ەلدىڭ ورتالىعى مەن لۋسون ارالىنا ەرەكشە كوپ جاۋعان.
نوسەر جاۋىن سالدارىنان پايدا بولعان سۋ تاسقىندارى ادامداردىڭ ومىرىنە، ناقتىراق ايتقاندا كەمىندە 2 ميلليون ادامنىڭ تاعدىرىنا كەرى اسەرىن تيگىزدى.
نوسەر جاۋىننىڭ ىقپالىمەن بولعان كوشكىن مەن سۋ تاسقىندارىنىڭ سالدارىنان مانيلا مەن لۋزون ارالدارىندا وتكەن اپتادا 25 ادام مەرت بولدى.
جىل سايىن فيليپپين ەلىندە 20 عا جۋىق تايفۋندار مەن داۋىلدار سوعادى.
