اقمولا وبلىسىندا تانىسىن اتىپ ولتىرگەن 51 جاستاعى استانالىق ۇستالدى

كوكشەتاۋ. قازاقپارات - اقمولا وبلىسىندا استانالىق تانىسىن اتىپ ءولتىردى، دەپ حابارلايدى قازاقپارات ءتىلشىسى.

وبلىستىق پ د باسپا ءسوز قىزمەتىنىڭ مالىمەتىنشە، قاندى قىلمىس شىلدەنىڭ 18-دە سەلينوگراد اۋدانىنىڭ قاراتومار اۋىلىندا بولعان. بۇل تۋرالى تاڭعى ساعات 08:40 شاماسىندا جەرگىلىكتى پوليتسيا بولىمىنە حابارلاندى. وندا وق جاراقتىن العان 36 جاستاعى ەر ادامنىڭ ەلورداداعى قالالىق اۋرۋحانادا كوز جۇمعانى ايتىلعان.

«وسىعان بايلانىستى پوليتسيا قىلمىستىق كودەكستىڭ 99-بابى 1-بولىگى بويىنشا سوتقا دەيىنگى تەرگەۋدى باستادى. ەر ادامعا نۇر- سۇلتان قالاسىنىڭ 51 جاستاعى تۇرعىنى وق اتقانى انىقتالدى. بەلگىلى بولعانداي، 18- شىلدە كۇنى ءبىر ءىس- شارادا كەزدەسكەن ەكى ەر ادام قوسىلىپ اراق ىشكەن. كەيىن قاراتومار اۋىلىندا وتىرىستى جالعاستىرعان. ءتۇننىڭ ءبىر ۋاعىندا ەكەۋارا جانجال شىعىپ، كۇدىكتى سول اۋىلدا جالعا العان ۇيدە ساقتالعان مىلتىقتى الىپ، دوسىنا وق اتقان. ەر ادام العان جاراقاتىنان اۋرۋحانانىڭ جانساقتاۋ بولىمىندە كوز جۇمدى»، - دەدى ۆەدومستۆودان.

پ د باسپا ءسوز قىزمەتىنەن اتاپ وتكەندەي، قازىرگى كەزدە قىلمىستىق ءىستى تەرگەۋ جالعاسۋدا. كۇدىكتى ۋاقىتشا ۇستاۋ وقشاۋلاعىشىنا قامالدى. پوليتسيا كۇدىكتىدەن م ر-153 مىلتىعىن تاركىلەدى.

اۆتور: اسلان وسپانوۆ