سوعىسى جىلدارىندا قازاقستاننان قان مايدانعا 5118 قىز- كەلىنشەك اتتاندى

 استانا. قازاقپارات - قازاق قىزدارى ۇلى وتان سوعىسىندا ەرلىكتىڭ ەرەن بيىگىنەن كورىنىپ، ەلىمىزدى داڭققا بولەدى.

 بۇل تۋرالى بۇگىن ەلورداداعى ءاليا مولداعۇلوۆانىڭ مەموريالدى كەشەنىنە گۇل شوقتارىن قويۋ راسىمىندە ق ر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ءتورايىمى ساۋلە ايتبايەۆا ايتتى.

 «قازاق قىزدارى وتان قورعاۋ جولىندا ەشكىمنەن دە، ەشتەڭەدەن دە قالىس بولعان ەمەس. ولار مەرگەن دە، ۇشقىش تا، پۋلەمەتشى دە، ءتىپتى پارتيزان دا بولدى جانە قاي جەردە جۇرسە دە ەرلىكتىڭ ەرەن بيىگىنەن كورىنىپ، ەلىمىزدى داڭققا بولەدى. ولار سولداتتىڭ كەرزى ەتىگىن، شينەلىن كيىپ، سوناۋ بەرلينگە دەيىن باردى. اتاعى بۇكىل ەلىمىزگە، قالا بەردى الەمگە ءمالىم ءاليا، مانشۇك، حيۋاز سياقتى باتىر قىزدارىمىزدىڭ ەرلىگىن قانشا ايتساق تا ارتىق بولماسى انىق»، - دەدى س. ايتبايەۆا.

سونىمەن قاتار ول قاتىسۋشىلاردىڭ نازارىن ءاليا مولداعۇلوۆانىڭ ۇلى وتان سوعىسىنداعى ەرلىگىن پاش ەتەتىن ءبىر وقيعاعا اۋداردى.

 «جالپى قازىرگى دەرەكتەر بويىنشا قازاقستاننان مايدانعا 5118 قىز- كەلىنشەك اتتانعان. مايدانداعى دارىگەرلەردىڭ 41 پايىزى، فەلدشەرلەردىڭ 43 پايىزى، مەدبيكەلەردىڭ 100 پايىزى ايەلدەر بولعان. سول ءبىر الاساپىران كەزەڭدە اۋىرتپاشىلىقتىڭ الدىڭعى شەبىندە انالارىمىز ءجۇردى دەسەك ارتىق ايتقاندىق ەمەس. مايداندا توگىلگەن ەرلەرىمىزدىڭ قانى مەن تىلدا تامشىلاعان ەڭبەككەرلەرىمىزدىڭ ماڭداي تەرى ەشقاشان ۇمىتىلمايدى»، - دەدى كوميتەت ءتورايىمى.

 اۆتور: مارلان جيەمباي