نۇر-سۇلتاندا ءبىر كەلى قانت 510 تەڭگە: اكىمدىك ماسەلەگە تۇسىنىك بەردى

قازاقپاراتتىڭ الەۋمەتتىك جەلىدەگى پاراقشالارىنا استانالىق ينتەرنەت قولدانۋشىلاردان قانت باعاسى 510 تەڭگەگە دەيىن كۇرت قىمباتتاعانى تۋرالى مالىمەتتەر كەلىپ تۇسكەن بولاتىن.

بۇل دەرەكتەردى ينۆەستيتسيالار جانە كاسىپكەرلىكتى دامىتۋ باسقارماسىنا جولداعانىمىزدا مىناداي جاۋاپ الدىق.

«نۇر-سۇلتان قالاسىنىڭ اكىمدىگى «ساۋدا قىزمەتىن رەتتەۋ تۋرالى» قازاقستان رەسپۋبليكاسىنىڭ 2004-جىلعى 12- ساۋىردەگى 544- زاڭىنا سايكەس، تەك الەۋمەتتىك ماڭىزى بار ازىق-تۇلىك تاۋارلارىنىڭ باعالارىن رەتتەۋ بويىنشا شارالار قابىلدايدى. قانتتىڭ باعاسىن تۇراقتاندىرۋ ءۇشىن اينالىم تەتىگى اياسىندا قارىزدار بەرىلگەن. مىسالى، ماگنۋم جەلىلەرىندە مامىر ايىنا دەيىن قانتتىڭ ءبىر كەلىسى 319 تەڭگە بولادى، ال «استىقجان»، «ۆكۋسمارت»، «ايان»، «شاپاعات»، «انۆار»، «فەرماگ» دۇكەندەرىندە قازان ايىنا دەيىن 320 تەڭگە تۇراتىن بولادى. اينالىم تەتىگى بويىنشا قارىز الىپ، باعانى تۇراقتاندىرىپ وتىرعان كاسىپكەرلەردىڭ ساۋدا نۇكتەلەرىندە قانت باعاسى كوتەرىلمەيدى. جاساسقان شارتتا وسى باعالار كورسەتىلگەن. سوندىقتان تۇراقتاندىرۋ قورى باعاسىن ۇستاپ تۇرعان تاۋارلاردىڭ قۇنىنا سىرتقى فاكتورلار اسەر ەتپەيدى»، - دەپ جازىلعان تۇسىندىرمەدە.

تۇراقتاندىرۋ قورى استانا بويىنشا قانداي تاۋارلارعا، قاي نۇكتەلەردە باعانى ۇستاپ تۇرعانىن ءبىلۋ ءۇشىن مىنا سىلتەمە ارقىلى تىزىممەن تانىسۋعا بولادى.

«ەگەر سىزدە باعانىڭ كوتەرىلۋىنە قاتىستى اقپارات بولسا، ساۋدا نىسانىن، ونىڭ مەكەنجايىن، تاۋار ماركاسىن مەن باعاسىن كورسەتە وتىرىپ، نۇر-سۇلتان قالاسىنىڭ اكىمدىگىنە جازباشا وتىنىشپەن، سونداي-اق مىنا بايلانىس تەلەفوندارى ارقىلى حابارلاسۋىڭىزدى سۇرايمىز: 556899، 556978. ءسىزدىڭ ءوتىنىشىڭىزدىڭ نەگىزىندە تەكسەرىس جۇرگىزىلەتىن بولادى. سونىمەن قاتار، نۇر-سۇلتان قالاسىنىڭ مونوپولياعا قارسى دەپارتامەنتىنىڭ ايماقتىق بولىمشەسىنە حابارلاسا الاسىز»، - دەپ جازادى اكىمدىك ماماندارى.

دەگەنمەن، تۇرعىنداردىڭ بىزگە جولداعان شاعىمى نەگىزىندە «اسەم» بازارىنداعى ساۋدا نۇكتەلەرىنىڭ ءبىرىنىڭ يەسىنە ايىپپۇل تاعايىندالعانى ءمالىم بولدى. بۇل تۋرالى بازار ديرەكتورى نۇرلان نۇرماعامبەتوۆ قازاقپارات تىلشىسىنە ايتتى.

«ول شاعىمدار بويىنشا ساۋدا نۇكتەلەرىنىڭ يەلەرىمەن جۇمىس جۇرگىزدىك. ءبىر نۇكتەنىڭ يەسى قانتتى جەتكىزۋشىدەن 420 تەڭگەدەن الىپ، 500 تەڭگەدەن ساتقان. وعان شارا قولداندىق. وزدەرى دە ەلدىڭ قانتقا سۇرانىسى ارتقاندىقتان الىپساتارلاردان قىمباتقا العانىن ايتىپ اقتالدى. سوندا دا ايىپپۇل سالدىق. بازارداعى ىشكى ەرەجە بويىنشا ونداي ايىپپۇلدىڭ باعاسى - 3 مىڭ تەڭگە. قازىر ءوزىم بازاردا ءجۇرمىن. قانت ساتىلىپ جاتقان جوق. سەبەبى قانت جوق. بۇگىن باسقا تاۋارلار بويىنشا دا ساۋدا نۇكتەلەرىن ارالاپ، قاراپ شىقتىم. الەۋمەتتىك ماڭىزى بار تاۋار سانالاتىن 19 اتالىم بويىنشا 15 پايىزدان ارتىق ۇستەمە باعا قوسقان دەرەكتەر كەزدەسپەدى. باعا كوتەرۋ تالابىن 3 رەتتەن ارتىق بۇزعاندارمەن كەلىسىمشارتتى ۇزەمىز. سوندىقتان كەز كەلگەن شاعىمدى تەكسەرۋگە دايىنبىز»، - دەيدى بازاردىڭ ديرەكتورى.