بەس جىل ىشىندە بازالىق زەينەتاقى ورتا ەسەپپەن 50 پايىز ارتادى
جىل سايىن ينفلياتسيا دەڭگەيىنە بازالىق زەينەتاقىنى جانە ىنتىماقتى زەينەتاقىنى يندەكستەۋدەن باسقا - مەملەكەت باسشىسىنىڭ قازاقستان حالقىنا وتكەن جولداۋىندا ايتىلعان تاپسىرمالاردى ىسكە اسىرۋ اياسىندا ينفلياتسيا دەڭگەيىنەن 2 پايىزعا ارتىپ، مەملەكەتتىك زەينەتاقى تولەمدەرىن تاعايىنداۋ پارامەترلەرىن وزگەرتۋ ەسەبىنەن 1,4 ميلليوننان استام ادامنىڭ زەينەتاقىسى قوسىمشا ءوستى.
بۇعان دەيىن حابارلانعانداي، مەملەكەت باسشىسىنىڭ تاپسىرمالارىن ىسكە اسىرۋ شەڭبەرىندە ءبىرقاتار شارالار كوزدەلگەن.
بىرىنشىدەن، 2023-جىلدان 2027-جىلعا دەيىنگى كەزەڭدە ەڭ تومەنگى بازالىق زەينەتاقىنىڭ مولشەرىن ەڭ تومەنگى كۇنكورىس دەڭگەيى 54 تەن 70 پايىزىنا ال، ەڭ جوعارى مولشەرى – 100 دەن 120 پايىزعا دەيىن كەزەڭ-كەزەڭىمەن ۇلعايادى.
وسى جىلدىڭ باسىندا بازالىق زەينەتاقىنىڭ ەڭ تومەنگى مولشەرى 54 پايىزدان 60 پايىزعا دەيىن كوتەرىلدى. بۇل ءوسىم، ەڭ الدىمەن، ەڭ تومەنگى زەينەتاقى الۋشىلارعا باعىتتالعان.
ولار ءۇشىن بازالىق زەينەتاقىنىڭ ءوسىمى - 21 پايىز بولدى.
بەس جىل ىشىندە بازالىق زەينەتاقى مولشەرى ورتا ەسەپپەن 50 پايىز دەيىن ارتادى جانە بۇل قازاقستاننىڭ بارلىق زەينەتكەرلەرىنە (بۇگىنگى كۇنى 2,3 ميلليون ادام) قاتىستى بولادى.
بۇل رەتتە بازالىق زەينەتاقى مولشەرى ەڭ تومەنگى كۇنكورىس دەڭگەيىنىڭ ينفلياتسيا دەڭگەيىنە وزگەرۋىنە بايلانىستى جىل سايىن ارتتىرىلادى.
ەكىنشىدەن، 2023-جىلعى 1- قاڭتاردان باستاپ زەينەتكەرلىككە شىعاتىن ازاماتتار ءۇشىن ىنتىماقتى زەينەتاقىنى ەسەپتەۋ ءۇشىن پايدالانىلاتىن ەڭ جوعارى تابىس مولشەرى 46 دان 55 ايلىق ەسەپتىك كورسەتكىشكە دەيىن ۇلعايتىلدى.
وزدەرىڭىز بىلەتىندەي، زەينەتاقى جوعالتقان تابىستىڭ ورنىن تولتىرۋ. ىنتىماقتى زەينەتاقىنى تاعايىنداۋ كەزىندە تەك ەكى كورسەتكىش ەسكەرىلەدى: 1998-جىلعى 1- قاڭتارداعى ەڭبەك ءوتىلى جانە زەينەتكەرلىككە شىققانعا دەيىنگى كەزەڭدەگى ورتاشا ايلىق تابىس، ياعني بۇل كورسەتكىشتەر نەعۇرلىم جوعارى بولسا، زەينەتاقى سوعۇرلىم جوعارى بولادى.
ەگەر وتكەن جىلى جاسىنا بايلانىستى زەينەتاقىنى ەسەپتەۋ ءۇشىن ەسكەرىلەتىن ەڭ جوعارى تابىس 46 ا ە ك نەمەسە 146 مىڭ تەڭگەنى قۇراسا، ەندى ونى 55 ا ە ك- كە دەيىن ارتتىرعان كەزدە ول بيىل شامامەن 190 مىڭىن قۇرايدى، بۇل زەينەتاقى مولشەرىنە تىكەلەي اسەر ەتتى.
بۇل وزگەرىس زەينەتكەرلەر مەن ەندى زەينەتكە شىققان ازاماتتارعا دا اسەر ەتتى.
زەينەتاقىنى ەسەپتەۋ كەزىندە قابىلداناتىن ەڭ جوعارى تابىستىڭ ارتۋى تاعايىندالعان ىنتىماقتى زەينەتاقىلاردىڭ مولشەرىن ۇلعايتتى جانە زەينەتاقى الدىنداعى كەزەڭدەگى زەينەتاقى مەن جالاقى مولشەرىنىڭ سالىستىرىمدىلىعىن قامتاماسىز ەتتى.
بۇل رەتتە، تاعايىندالعان ىنتىماقتى زەينەتاقى مولشەرى ينفلياتسيا دەڭگەيىنەن 2 پايىز ارتىپ جىل سايىن ءوسىپ وتىراتىنىن اتاپ وتكەن ءجون.
جوعارىدا اتالعان بارلىق شارالار ق ر الەۋمەتتىك كودەكسىندە كوزدەلگەن جانە زەينەتاقى جۇيەسىنىڭ تيىمدىلىگىن ارتتىرۋعا ءارى ازاماتتاردى زەينەتاقىنىڭ بارابار مولشەرىمەن قامتاماسىز ەتۋگە مۇمكىندىك بەرەدى.
