سولتۇستىك وڭىرلەرگە كوشەتىندەردىڭ 50 پايىز باسپانا شىعىنىن ۇكىمەت تولەيدى

استانا. قازاقپارات - ەڭبەك جانە حالىقتى الەۋمەتتىك قورعاۋ مينيسترلىگى ەڭبەك كۇشى از وڭىرلەرگە قازاقستاندىقتاردى قونىستاندىرۋ پروتسەسىن جەتىلدىرىپ جاتىر، دەپ حابارلايدى قازاقپارات ءتىلشىسى.

«بۇگىندە ەڭبەك كۇشى تاپشى وڭىرلەردىڭ ماسەلەسى كۇن تارتىبىندە. ول دەگەنىمىز جۇمىس كۇشى از، اسىرەسە سولتۇستىك وڭىرلەرگە وڭتۇستىكتەن ازاماتتاردى كوشىرۋ. جىل سايىن كۆوتا ءبولىنىپ كەلەدى، ونىڭ كولەمى ارتۋدا. مىسالى، بيىل وتكەن جىلعا قاراعاندا 566 كۆوتاعا كوبەيدى. ازاماتتاردى قونىس اۋدارۋعا ىنتالاندىرۋ ماقساتىندا اتالعان شارۋانى اۆتوماتتاندىرۋ قولعا الىندى»، - دەدى ءىلياس يسپانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ودان بولەك، ءار ءوڭىر بويىنشا جول كارتاسى بەكىتىلىپ، كوشۋگە تاپسىرىس الدىن الا بەرىلەدى.

«سونىمەن قاتار بۇگىندە ۇتقىرلىق سەرتيفيكاتى ەنگىزىلدى. ول بويىنشا ازاماتتاردى باسپانامەن قامتۋ شىعىنىنىڭ 50 پايىزىن ۇكىمەت تولەپ بەرەدى، قالعان 50 پايىز شىعىندى جەرگىلىكتى اتقارۋشى ورگان نەمەسە جۇمىس بەرۋشى وتەيتىن بولسا، وندا كۆوتا سانى ارتا تۇسپەك»، - دەيدى كوشى- قون كوميتەتىنىڭ باسشىسى.

سونداي-اق، بريفينگ بارىسىندا كوشى-قون ماسەلەسىنە قاتىستى بىرنەشە جايتتار بەلگىلى بولدى.

اتاپ ايتقاندا، ەلىمىزگە ينۆەستيتسيا قۇيعان شەتەل ازاماتتارىنا يمميگرانت ۆيزاسىمەن قاتار 10 جىل تۇرۋعا رۇقسات بەرىلمەك.

بۇگىندە قازاقستاندا 14417 شەتەل ازاماتى جۇمىس ىستەپ جاتىر.

قازاقستاندىقتاردىڭ وڭتۇستىك كورەيادا ەڭبەك ەتۋ ماسەلەسىن ەكىجاقتى كەلىسىم ارقىلى زاڭداستىرۋ جاعى قارالىپ جاتىر.

الداعى ۋاقىتتا قانداس مارتەبەسىنە قۇجاتتار قازاقستاننىڭ شەتەلدەگى ەلشىلىكتەرىندە قابىلدانادى.