وتاندىق ءدارى-دارمەكتەردىڭ ىشكى نارىقتاعى ۇلەسىن 50 پايىزعا دەيىن جەتكىزۋ شارالارى تالقىلاندى
بۇل باعىتتاعى شارالار پرەمەر-مينيستر ءاليحان سمايىلوۆتىڭ توراعالىعىمەن وتكەن پرەزيدەنت ق. توقايەۆتىڭ سايلاۋالدى باعدارلاماسىن ىسكە اسىرۋ جونىندەگى رەسپۋبليكالىق شتابتىڭ وتىرىسىندا تالقىلاندى، دەپ حابارلايدى قازاقپارات ۇكىمەتتىڭ رەسمي سايتىنا سىلتەمە جاساپ.
دەنساۋلىق ساقتاۋ ءمينيسترى اجار عينياتتىڭ ايتۋىنشا، بۇل كورسەتكىشكە قول جەتكىزۋ ءۇشىن رەسپۋبليكانىڭ فارماتسيەۆتيكالىق جانە مەديتسينالىق ونەركاسىبىن دامىتۋ، عىلىمي جانە كادرلىق الەۋەتتى ارتتىرۋ، نورماتيۆتىك-قۇقىقتىق بازانى جەتىلدىرۋ جانە جالپى فارماتسيەۆتيكالىق سەكتوردى سيفرلاندىرۋ بويىنشا شارالار قابىلدانىپ جاتىر.
وسى ورايدا، بىرلەسكەن كاسىپورىندار اشۋ جانە الەمدىك فارماتسيەۆتيكالىق يندۋستريانىڭ جەتەكشى كومپانيالارىنىڭ وندىرىستەرىن لوكاليزاتسيالاۋ بويىنشا بەلسەندى تۇردە جۇمىس جۇرگىزىلە باستادى. ولاردىڭ قاتارىندا Hoffmann-La Roche (شۆەيتساريا)، Pfizer (ا ق ش)، Novo Nordisk (دانيا)، Takeda (جاپونيا)، SK Plasma (وڭتۇستىك كورەيا) جانە ت. ب. بار.
كەڭەستە فارماتسيەۆتيكالىق قىزمەتتى قولداۋ جانە دامىتۋ قاۋىمداستىعىنىڭ باسشىسى مارينا دۋرمانوۆا ءوز ۇسىنىستارىن ايتتى. ول مەديتسينالىق ونىمدەردى جەتكىزۋشىلەر مەن ءبىرىڭعاي مەملەكەتتىك ساتىپ الۋشى اراسىنداعى ۇزاق مەرزىمدى شارتتاردى ۇزارتۋ، باعا بەلگىلەۋ، سالىق سالۋ، تاڭبالاۋ، ارنايى ەكونوميكالىق ايماقتار مەن فارماتسيەۆتيكالىق كلاستەرلەر قۇرۋ، وتاندىق پرەپاراتتار مەن مەديتسينالىق بۇيىمداردى تىركەۋ راسىمدەرىن جەڭىلدەتۋ، كرەديتتىك رەسۋرستارعا قولجەتىمدىلىكتى كەڭەيتۋ، ەكسپورتتى قولداۋ جانە ت. ب. ماسەلەلەردى قوزعادى.
ءاليحان سمايىلوۆ دەنساۋلىق ساقتاۋ مينيسترلىگىنە ايتىلعان ۇسىنىستاردى تالداپ، ولاردى ەلىمىزدە وندىرىلگەن ءدارى-دارمەكتەردىڭ ىشكى نارىقتاعى ۇلەسىن %50 عا جەتكىزۋ بويىنشا جول كارتاسىندا ەسكەرۋدى تاپسىردى.
تالقىلاۋدى قورىتىندىلاي كەلە، ۇكىمەت باسشىسى سوڭعى بىرنەشە جىلدا قازاقستاننىڭ فارماتسيەۆتيكا سالاسى تۇراقتى ءوسىم كورسەتىپ وتىرعانىن اتاپ ءوتتى: شىعارىلاتىن پرەپاراتتاردىڭ اسسورتيمەنتى كەڭەيىپ، كولەمى ۇلعايا ءتۇستى. الايدا، ولاردىڭ ىشكى نارىقتاعى ۇلەسى باياۋ ءوسىپ وتىر، قازىرگى كورسەتكىش - %28.
«دەمەك، ءبىز ءدارى-دارمەك ءوندىرىسىن جىل سايىن تۇراقتى تۇردە ءوسىرۋىمىز قاجەت. وسىعان بايلانىستى فارماتسيەۆتيكالىق كاسىپورىنداردىڭ بارلىعىنا ريەۆيزيا جۇرگىزۋ كەرەك. ءبىز ولاردىڭ دامۋ الەۋەتىن جانە قۋاتىن ارتتىرۋ مۇمكىندىكتەرىن ناقتى ءبىلۋىمىز كەرەك»، - دەدى پرەمەر-مينيستر.
سونىمەن قاتار ءا. سمايىلوۆ ومىرلىك ماڭىزى بار دارىلىك زاتتار مەن مەديتسينالىق بۇيىمدار بويىنشا ۇزاق مەرزىمدى شارتتار جاساسۋدىڭ ماڭىزىن اتاپ ءوتتى.
«ونكولوگيالىق جانە جۇرەك-قان تامىرلارى اۋرۋلارىن ەمدەۋگە ارنالعان پرەپاراتتارعا ەرەكشە نازار اۋدارۋ كەرەك. ول ءۇشىن الداعى جىلدارعا قاجەتتىلىكتى ەسكەرە وتىرىپ، وسىنداي دارىلىك زاتتاردىڭ تىزبەسى بەكىتىلۋى ءتيىس»، - دەدى ۇكىمەت باسشىسى.
پرەمەر-مينيستر قارالعان شارالاردىڭ بارلىعى 2029-جىلعا دەيىنگى ءتيىستى جول كارتاسىندا كورسەتىلىپ، ونى ءبىر اي مەرزىمدە بەكىتۋ كەرەك دەپ تۇيىندەدى.
