سولتۇستىك قازاقستاندا 50 جىلقى مۇزعا باتىپ ءولدى

استانا. قازاقپارات – 2- جەلتوقسان كۇنى س ق و ايىرتاۋ اۋدانىنىڭ پوليتسيا بولىمىنە ءالجان اۋىلىندا 50 جىلقى جوعالعانى تۋرالى حابارلاما كەلىپ تۇسكەن، دەپ حابارلايدى Polisia.kz.

جىلقىلار س ق و ايىرتاۋ اۋدانى ءالجان اۋىلىنىڭ تۇرعىندارىنا تيەسىلى ەكەنى انىقتالدى. جانۋارلار 27- قاراشادا ەركىن جايىلىمنان جوعالىپ كەتكەن.

ىزدەۋ بارىسىندا جوعالعان جىلقىلار مۇزدىڭ ىشىندە قاتقان كۇيىندە بارچي كولىنەن تابىلدى. الدىن الا بولجام بويىنشا، جىلقىلار باقتاشى بولماعان كەزدە كولدەگى مۇز ۇستىمەن جۇرگەن. كەيىن مۇز جارىلىپ، سۋعا باتىپ كەتكەن.

اتالعان فاكتى بويىنشا ايىرتاۋ اۋدانىنىڭ پوليتسيا بولىمىنە ارىز كەلىپ تۇسپەدى.

قازىرگى ۋاقىتتا پوليتسەيلەر بولعان وقيعانىڭ بارلىق ءمان-جايىن تەكسەرۋدە، ولگەن جانۋارلاردىڭ ناقتى سانى انىقتالىپ جاتىر.