مايمىل شەشەگى ۆيرۋسى ا ق ش- تىڭ بارلىق 50 شتاتىندا تىركەلگەن

ۆاشينگتون. قازاقپارات – ا ق ش- تىڭ دەنساۋلىق ساقتاۋ قىزمەتكەرلەرى مايمىل شەشەگى ۆيرۋسىنىڭ ەلدىڭ بارلىق 50 شتاتىندا انىقتالعانىن حابارلادى، دەپ جازادى قازاقپارات ABC News كە سىلتەمە جاساپ.

دۇيسەنبىدە اتالعان دەرتتەن ادا جالعىز ايماق - ۆايومينگ شتاتىندا ۆيرۋس انىقتالعانى تۋرالى حابارلاندى. شتاتتىڭ دەنساۋلىق ساقتاۋ دەپارتامەنتى لارامي وكرۋگىندە تۇراتىن ەر ادامنىڭ ۆيرۋس جۇقتىرعانىن جاريالادى.

قوعامدىق دەنساۋلىق ساقتاۋ قىزمەتكەرلەرى قازىر شتاتتا مايمىل شەشەگىنىڭ تارالۋ ءقاۋپىن ازايتۋ ءۇشىن ۆيرۋس جۇقتىرعان اداممەن بايلانىستا بولعان ادامداردىڭ سانىن انىقتاۋدا.

مامىر ايىنىڭ ورتاسىندا ماسساچۋسەتس شتاتىندا العاشقى ناۋقاس انىقتالعانى جاريالانعاننان بەرى ا ق ش- تىڭ اۋرۋلاردى باقىلاۋ جانە الدىن الۋ ورتالىقتارى دۇيسەنبىدە بۇكىل ەلدە اۋرۋعا شالدىعۋدىڭ 14100 دەن استام جاعدايى تىركەلكەنىن مالىمدەدى.

قازىرگى ۋاقىتتا ۆيرۋس جۇقتىرۋ سانى جاعىنان نيۋ- يورك كوش باستاپ تۇر - 2,7 مىڭنان استام ادام، ودان كەيىن كاليفورنيا، فلوريدا، تەحاس جانە دجوردجيا بار.

قوعامدىق دەنساۋلىق ساقتاۋ قىزمەتكەرلەرى مايمىل شەشەگى ۆيرۋسىمەن اۋىرعان كەز كەلگەن ادامدى ا ق ش- تىڭ ازىق- تۇلىك جانە ءدارى- دارمەك باسقارماسى ماقۇلداعان Jynneos ۆاكسيناسىن سالۋعا ۇندەپ وتىر.

ا ق ش دەنساۋلىق ساقتاۋ جانە حالىققا قىزمەت كورسەتۋ دەپارتامەنتىنىڭ مالىمەتىنشە، 9-تامىزداعى جاعداي بويىنشا 620 مىڭنان استام ۆاكتسينا دوزاسى ساتىپ الىندى. تاعى 1,1 ميلليون دوزاعا تاپسىرىس بەرۋگە بولادى.