ديقاندار ساتىپ العان تىڭايتقىش قۇنىنىڭ 50 پايىزىن مەملەكەت وتەيدى
بۇل تۋرالى ق ر اۋىل شارۋاشىلىعى ءمينيسترى ەربول قاراشوكەيەۆ ايتتى، دەپ حابارلايدى قازاقپارات ءتىلشىسى.
«بۇگىنگى تاڭدا تىڭايتقىش جەتكىزۋگە كەلىسىمشارت 290 مىڭ توننا كولەمىندە جاسالدى. بۇكىل وڭىرلەردە مينەرالدى تىڭايتقىشتاردى جونەلتىلىپ جاتىر. اگرارشىلارعا شامامەن 149 مىڭ توننا، ونىڭ ىشىندە وڭتۇستىك وڭىرلەرگە 51,3 مىڭ توننا تىڭايتقىش تيەلدى. قويمالارداعى قور، سونىڭ ىشىندە يمپورتتىق تىڭايتقىشتار قورى قالىپتاستى»، - دەدى مينيستر ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
وسى رەتتە ول فەرمەرلەر تىڭايتقىشتاردىڭ، ونىڭ ىشىندە وتاندىق تىڭايتقىشتاردىڭ قىمباتتىعى ماسەلەسىن كوتەرگەنىن اتاپ ءوتتى.
«ۇكىمەتپەن ءتيىستى جۇمىس جۇرگىزىلدى. مينەرالدىق تىڭايتقىشتاردىڭ ءىرى ءوندىرۋشىسى قازازوت كومپانياسى وندىرىلەتىن اممياك سەليتراسىنىڭ قۇنىن تونناسىنا 200 مىڭ تەڭگەدەن 160 مىڭ تەڭگەگە دەيىن تومەندەتۋ تۋرالى شەشىم قابىلدادى. ول شەشىم 16- ناۋرىزدان باستاپ كۇشىنە ەندى. بۇگىنگى تاڭدا اگرارشىلارمەن جاڭا باعا بويىنشا كەلىسىمشارت جاسالىپ جاتىر. بۇل رەتتە اكىمدىكتەر تاراپىنان سۋبسيدياعا 27 ميلليارد تەڭگە قاراستىرىلعانىن اتاپ ءوتۋ قاجەت. ياعني، ساتىپ الىنعان تىڭايتقىش قۇنىنىڭ 50 پايىزىن مەملەكەت وتەيدى»، - دەدى ەربول قاراشوكەيەۆ.
ونىڭ ايتۋىنشا، پەستيتسيدتەردىڭ دە باعاسى ءوستى. 2020 -جىلى پەستيتسيد باعاسى كوكتەمدە 70 پايىز، ال كۇزدە 2 ەسە قىمباتتاعان.
«2022 -جىلعا ارنالعان پەستيتسيدتەردى سۋبسيديالاۋ باعدارلاماسىنا 29,7 ميلليارد تەڭگە كوزدەلگەن. بۇل ەگىس الاڭىن 100 پايىز وڭدەۋدى قامتاماسىز ەتۋگە جانە سول ارقىلى قولايلى فيتوسانيتاريالىق جاعدايدى ساقتاۋعا مۇمكىندىك بەرەدى»، - دەدى ول.
اۆتور: مارلان جيەمباي
