ۋكراينادا قازاقستاندىق 50 اۋىر جۇك كولىگى جۇرگىزۋشىسىنىڭ ورنالاسقان جەرى بەلگىلى بولدى
«قازىردىڭ وزىندە 50 اۋىر جۇك كولىگىنىڭ جۇرگىزۋشىسى ۋكرايناداعى ءوزىنىڭ ورنالاسقان جەرى تۋرالى حابارلادى. ولاردىڭ كوپشىلىگى جۇك تيەلگەن كولىكتەرىن تاستاپ، ەلدەن ۇشىپ كەتە المايدى. 25-اقپاندا اتامەكەن ۇ ك پ سىرتقى ىستەر، ساۋدا مينيسترلىكتەرىنە جانە يندۋستريا جانە ينفراقۇرىلىمدىق دامۋ مينيسترلىگىنە رەسەيلىك، بەلارۋستىق، ۋكرايندىق، پولشالىق جانە باسقا دا تاراپتاردان قازاقستاندىق تاسىمالداۋشىلاردىڭ ۋكراينا اۋماعىنان شىعۋى ءۇشىن «جاسىل ءدالىزدى» قامتاماسىز ەتۋ تۋرالى ماسەلەنى پىسىقتاۋ وتىنىشىمەن حات جولدادى»، - دەپ جازىلعان «اتامەكەن» ۇلتتىق كاسىپكەرلەر پالاتاسىنىڭ Telegram پاراقشاسىندا.
سونداي-اق، ۋكراينادا قالىپ قويعان كولىك جۇرگىزۋشىلەرىنە حابارلاندىرۋ جاريالاندى.
«ءبىز جۇرگىزۋشىلەر تۋرالى مالىمەتتەردى جيناۋدى جالعاستىرامىز جانە ولاردى جەدەل تۇردە ۆەدومستۆولارعا جولدايمىز. ەگەر ءسىز نەمەسە ءسىزدىڭ كومپانياڭىزدىڭ جۇرگىزۋشىسى ۋكراينادان شىعا الماي قالسا، جەكە دەرەكتەردى 77788701432+ (ۇ ك پ call-ورتالىعى) نومىرىنە جىبەرۋگە بولادى»، - دەپ حابارلايدى «اتامەكەن» ۇلتتىق كاسىپكەرلەر پالاتاسى.
بۇعان دەيىن ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ۋكراينا شەكاراسىندا تۇرعان قازاقستاندىقتاردىڭ جارتىسى پولشاعا جەتكەنى تۋرالى حابارلاعان ەدى.
