الاياق الەۋمەتتىك جەلىدەگى فوتوسۋرەتتەر ارقىلى بوتەن ادامدارعا 50 نەسيە راسىمدەگەن
«ينتەرنەت الاياقتاردى انىقتاۋ بويىنشا بيىلعى 9-11-اقپان ارالىعىندا «Anti-Fraud» وپەراتسياسى وتكىزىلدى. ءۇش كۇندە 300 دەن استام قىلمىس تىركەلىپ، بۇرىن جاسالعان 289 الاياقتىق قىلمىسى اشىلدى. الاياقتىقتىق كوپ تاراعان ءتۇرى - ول ينتەرنەت الاڭداردا تاۋار ساتۋ نەمەسە قىزمەت كورسەتۋگە بايلانىستى. ولار تاۋار باعاسىن تومەن باعامەن بەلگىلەيدى، سونداي-اق قىزمەت كورسەتۋ قۇنىن تومەندەتىپ كورسەتەدى. الاياقتار تاۋار ساتىپ الۋشىلارعا بوتەن ادامنىڭ اتىنا راسىمدەلگەن شوتتارعا تولەمدى تولىقتاي نەمەسە ءىشىنارا جاساۋدى سۇرايدى»، - دەدى ق. نۇرماعامبەتوۆ ونلاين رەجيمدەگى بريفينگىدە.
ونىڭ ايتۋىنشا، ميكرونەسيەلىك ۇيىمداردا ونلاين قارىزداردى زاڭسىز راسىمدەۋ جيىلەپ كەتتى. قىلمىسكەرلەر ينتەرنەت ارقىلى ازاماتتاردىڭ جەكە مالىمەتتەرىن الۋعا تىرىسادى.
«شىمكەنت قالاسىنىڭ تۇرعىنى الەۋمەتتىك جەلىلەردە تابىلعان جەكە قۇجاتتار تۋرالى حابارلاندىرۋلاردى ىزدەگەن. جەكە كۋالىك فوتوسۋرەتتەرىنەن ءتيىستى مالىمەتتەردى العاننان كەيىن، ءتۇرلى وبلىستار تۇرعىندارىنىڭ اتىنا 50 گە تارتا ونلاين نەسيە راسىمدەگەن»، - دەدى كريمينالدىق پوليتسيا دەپارتامەنتىنىڭ وكىلى.
سونىمەن قاتار ول بانك كارتالارى مەن دەپوزيتتەردەگى قارجىنى زاڭسىز يەمدەنۋ ءۇشىن جەكە مالىمەتتەردى الۋدىڭ باسقا دا تاسىلدەرى تىركەلىپ جاتقانىن ايتتى. بۇدان بۇرىن حابارلانعانداي، قىلمىستاردىڭ جالپى اۋقىمىندا 10 پايىزدان استامى الاياقتىققا تيەسىلى.
«پاندەميا كەزىندە الەمدە قابىلدانعان شەكتەۋلەر قوعامداعى ماسەلەلەر مەن مىندەتتەردىڭ كوبىسىن ينتەرنەت جەلىسى ارقىلى شەشۋگە ۇيرەتتى. دەگەنمەن كيبەرقىلمىستار سانى دا جيىلەپ كەتتى، ونىڭ ىشىندە ينتەرنەت الاياقتىق جاعدايلارى كوبەيدى. وتكەن جىلى مۇنداي 14 مىڭ قىلمىس جاسالسا، ال بيىلدىڭ قاڭتار ايىندا 1700-دەن اسىپ ءتۇستى»، - دەدى ق. نۇرماعامبەتوۆ.
اۆتور: رۋسلان عابباس
