ەسىك كولىنەن 50 تۋريس قۇتقارىلدى

دەمالۋشىلار مىنگەن اۆتوبۋس كوكتايعاق سالدارىنان جول جيەگىنە شىعىپ قالعان، دەپ حابارلايدى قازاقپارات ءتىلشىسى.

الماتى وبلىستىق ت ج د باسپا ءسوز قىزمەتىنىڭ مالىمەتىنشە، 15-قاراشادا جولاۋشىلار اۆتوبۋسىنىڭ ءبىرى ەسىك كولىنە باراتىن جولدا كوكتايعاق سالدارىنان تۇرىپ قالدى. ول باسقا كولىكتەر مەن اۆتوبۋستاردىڭ قوزعالىسىنا كەدەرگى كەلتىرگەن. جەدەل قابىلدانعان شارا بارىسىندا 50 شەتەلدىك جانە جەرگىلىكتى تۋريست ەسىك ورمان شارۋاشىلىعى ەكولوگيالىق بەكەتىنە جاياۋ ءتۇستى. قۇتقارۋشىلار ولاردى ءۇش توپقا ءبولىپ، ءار توپقا ءبىر-ءبىر وفيتسەردەن بەكىتىلىپ، بارلىعى امان- ەسەن قاۋىپسىز جەرگە جەتكىزىلدى.

ەكوپوستان تۋريستەردى ەڭبەكشىقازاق اۋدانى اكىمدىگى دايىنداعان اۆتوبۋستار كۇتىپ تۇردى. ولار ەسىك قالاسىنىڭ اۆتوۆوكزالىنا جەتكىزدى.

تەكسەرۋ بارىسىندا جولدا تۇرىپ قالعان جولاۋشىلار اۆتوبۋسى جازعى دوڭگەلەكتەرمەن جۇرگەنى انىقتالدى.

بىرنەشە ساعات ىشىندە كولىك تۇرىپ قالعان جەرىنەن شىعارىلىپ، كەرى قايتارىلدى. قازىرگى ۋاقىتتا قاۋىپسىزدىك ماقساتىندا ەسىك كولىنە كىرۋ جابىق. الماتى وبلىسىنىڭ ت ج د جازاتايىم وقيعالارعا جول بەرمەۋ ماقساتىندا قىسقى دوڭگەلەكتەردى اۋىستىرۋ جانە اۋا رايىنىڭ وزگەرۋىن باقىلاۋعا كەڭەس بەرەدى.

اۆتور: سامال قابىشەۆا