موزامبيكتىڭ سولتۇستىگىندە جاۋىنگەرلەر 50 ادامدى قىرىپ تاستادى

كۋاگەرلەردىڭ ايتۋىنشا، يسلامشىل- كوتەرىلىسشىلەر قۇربانداردى مۋاتيدە اۋىلىنداعى فۋتبول الاڭىنا اپارىپ ولتىرگەن. پوليتسيانىڭ حابارلاۋىنشا، كەيىنگى ءۇش كۇندە شابۋىل جاساۋشىلار موزامبيكتىڭ سولتۇستىگىندەگى گازعا باي كابۋ- دەلگادۋ پروۆينتسياسىندا 50 دەن استام ادامدى ءولتىرىپ، مۇشەلەپ تاستاعان. كۇش كورسەتۋ ءالى دە جالعاسىپ جاتىر. موزامبيك پوليتسياسىنىڭ باس قولباسشىسى بەرناردينو ءرافاەلدىڭ اقپاراتى بويىنشا، «يسلام مەملەكەتىنە» قاتىسى بار سودىرلار ميۋدۋمبە جانە ماكوميا ايماعىنداعى بىرنەشە اۋىلعا شابۋىل جاساپ، بەيبىت تۇرعىنداردى ءولتىرىپ، ايەلدەر مەن بالالاردى ۇرلاپ، ۇيلەردى ورتەگەن.

كەيبىر ساراپشىلار، تارتىپسىزدىكتىڭ ءتۇپ- توركىنى دىندە ەمەس، ەلدەگى كەدەيلىك پەن تەڭسىزدىكتە بولۋى مۇمكىن دەپ ەسەپتەيدى. ولار وزدەرىن «اش- شاباب» دەپ اتايتىن يسلامشىلاردىڭ سوماليدە بايلانىسى جوق ەكەنىنە سەنىمدى. تارتىپسىزدىك سالدارىنان 2017 -جىلدان بەرى 2000 نان اسا ادام مەرت بولدى، ولاردىڭ جارتىسىنان كوبى - قاراپايىم تۇرعىندار. وتكەن ايدا جاريالانعان Amnesty International ەسەبى بويىنشا، كابۋ- دەلگادۋداعى شابۋىلدار گۋمانيتارلىق داعدارىسقا اكەپ سوقتى. 300000 نان اسا ادام قونىس اۋدارۋعا ءماجبۇر بولدى جانە 712000 تۇرعىن گۋمانيتارلىق كومەككە مۇقتاج.

ەسكە سالا كەتسەك، بۇل سوڭعى ۋاقىتتاعى جيحادشىلار جاساۋى مۇمكىن دەلىنگەن العاشقى تەراكت ەمەس. بۇعان دەيىن يسلامشىلار فرانسيا مەن اۋستريا استاناسى ۆەنادا سۇمدىق تەراكت جاساعان بولاتىن.

اۆتور: سەرىكبول قوشماعانبەتوۆ