ايىنا 50 مىڭ تەڭگەدەن سالىپ، قىمبات مۇلىك الۋعا ۋادە بەرەتىن قارجى پيراميداسى تەكسەرىلۋدە

نۇر-سۇلتان. قازاقپارات - ەلىمىزدىڭ 14 ايماعى مەن 17 قالاسىندا 22 وكىلدىگى بار قارجى پيراميداسىنىڭ قىزمەتى تەكسەرىلۋدە.

بۇل تۋرالى قازاقپارات قارجى مونيتورينگى كوميتەتىنىڭ باسپا ءسوز قىزمەتىنە سىلتەمە جاساپ حابارلايدى.

قارجى پيراميداسىنىڭ قىزمەتىن ق ر ق م قارجى مونيتورينگى كوميتەتىنىڭ پاۆلودار وبلىسى بويىنشا ەكونوميكالىق تەرگەۋ دەپارتامەنتى قىزمەتكەرلەرى تەكسەرۋدە.

قىمبات باعالى قانداي دا ءبىر مۇلىكتى ساتىپ الۋ ءۇشىن ازاماتتارعا 180 مىڭ تەڭگە كولەمىندە كىرۋ جارناسىن تولەۋ، سودان كەيىن اي سايىن 50 مىڭ تەڭگەدەن 10 اي بويىنا تولەم جاساۋ ۇسىنىلعان.

سالىنعان 180 مىڭ تەڭگەنىڭ 100 مىڭ تەڭگەسى تۇتىنۋ كووپەراتيۆى شوتىندا قالىپ، 80 مىڭ تەڭگە ارنايى قۇرىلعان ج ش س شوتىنا اۋدارىلىپ وتىرعان.

وسىلايشا ج ش س قىزمەتىندە مىندەتتى كىرۋ جارناسى، ءاربىر جاڭادان تارتىلعان قاتىسۋشى ءۇشىن بونۋستاردىڭ تولەنۋى، ب ا ق- تا جاپپاي جارناما جاساۋ، ينتەرنەت كەڭىستىكتە ءبىر الۋشىعا كوپتەگەن جىبەرۋشىلەردەن جاسالعان اقشا اۋدارىمى سياقتى قارجى پيراميداسىنىڭ بارلىق بەلگىلەرى كورىنىس تاپقان.

بۇگىنگى تاڭدا قارجى پيراميداسىنا سالىمشىلاردان جالپى سوماسى 3,9 ميلليارد تەڭگە اقشالاي قاراجات تارتىلعان. سوتقا دەيىنگى تەرگەۋ امالدارى جۇرگىزىلۋدە.

اتالعان ارەكەت بويىنشا ق ر ق ك 217-بابىنا (قارجىلىق (ينۆەستيتسيالىق) پيراميدانى قۇرۋ جانە وعان باسشىلىق ەتۋ) سايكەس مۇلىكتى تاركىلەۋمەن 5 جىلدان 10 جىلعا دەيىن باس بوستاندىعىنان ايىرۋ تۇرىندە قىلمىستىق جاۋاپكەرشىلىك قاراستىرىلعان.