قىركۇيەكتەن باستاپ مۇعالىمدەر جالاقىسىنىڭ 50 پايىزى كولەمىندە ۇستەمەاقى الا الادى

نۇر-سۇلتان. قازاقپارات - پەداگوگتار ۇستەمەاقى الۋى ءۇشىن جاز ايلارىنىڭ ىشىندە اتتەستاتتاۋ ءراسىمىن ءبىتىرۋىمىز كەرەك.

بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.

«پەداگوگ مارتەبەسى تۋرالى» زاڭ اياسىندا بيىلعى قىركۇيەك ايىنان باستاپ ارىپتەستەرىمىزگە ۇستەمەاقى الۋ مۇمكىندىگى تۋىپ وتىر. ول ءۇشىن جاز ايىندا تەستىلەۋدى، جالپى اتتەستاتتاۋ ءراسىمىن وتكىزىپ الۋىمىز كەرەك. بولجام بويىنشا 100 مىڭداعان ارىپتەسىمىز وسى تەستىلەۋگە قاتىسادى دەپ وتىرمىز. ارينە، بىرەۋى وتەدى، بىرەۋى وتە المايدى. قالاي دەسەك تە، ءبىز ونداي مۇمكىندىكتى بەرۋىمىز كەرەك. قىركۇيەكتەن باستاپ اتتەستاتتاۋدان وتكەن ارىپتەستەرىمىز ۇستەمەاقى الۋى ءتيىس»، - دەدى اسحات ايماعامبەتوۆ مينيسترلىكتىڭ Facebook پاراقشاسىندا ونلاين رەجيمدە وتكەن اپپارات جينالىسىندا.

سونىمەن قاتار، مينيستر بۇعان دەيىن بالاباقشا، كوللەدج پەداگوگتەرى، ديرەكتورلار مەن ولاردىڭ ورىنباسارلارى اتتەستاتتاۋدان وتپەگەنىن جانە ۇستەماقى الماعانىن اتاپ ءوتتى.

«بۇل ماسەلە كوپتەن بەرى كوتەرىلىپ كەلدى. مىسالى، كوللەدج پەداگوگتارى اتتەستاتتاۋدان وتەدى. ءبىراق، العان ساناتىنا ءتيىستى ۇستەماقى بەرىلمەيتىن. مەكتەپ مۇعالىمدەرى ۇستەمەاقى الادى، ال كوللەدج مۇعالىمدەرى المايتىن. بالاباقشا بويىنشا دا وسى ماسەلەنى ارىپتەستەرىمىز قانشا جىلدان بەرى كوتەرىپ كەلدى. ديرەكتورلار مەن ولاردىڭ ورىنباسارلارى تۋرالى ءتىپتى ايتۋدىڭ دا كەرەگى جوق. ولار اتتەستاتتاۋدان وتپەيتىن جانە وتسە دە ۇستەمەاقى المايتىن. ەندى ديرەكتور مەن ونىڭ ورىنباسارلارى اتتەستاتتاۋدان ءوتىپ، ناتيجەسىندە 30 دان 100 پايىزعا دەيىن جالاقىسىنا قوسىمشا ۇستەمەاقى الۋ مۇمكىندىگىنە يە بولادى. بالاباقشا، مەكتەپ، كوللەدج پەداگوگتارىنا 30 دان 50 پايىزعا دەيىن جالاقىسىنا قوسىمشا ۇستەمەاقى الۋعا مۇمكىندىك تۋىپ وتىر. بۇل قاڭتار ايىنان باستاپ قوسىلعان 25 پايىز جالاقىعا قوسىمشا تولەنەدى»، - دەدى اسحات ايماعامبەتوۆ.