زايسان اۋدانىنا گاز تارتۋ ماقساتىندا 50 ميلليون تەڭگە بولىنبەك – ش ق و
وبلىستىق اقپارات ورتالىعىنىڭ حابارلاۋىنشا، زايسان اۋدانىنىڭ اكىمى سەرىك اقتانوۆ 2019 -جىلدىڭ قورىتىندىسى تۋرالى حالىق الدىندا بايانداما جاسادى. ەسەپ بەرۋ كەزدەسۋى ش ق و اكىمى دانيال احمەتوۆتىڭ قاتىسۋىمەن وتكەن. ايماق باسشىسىنىڭ ايتۋىنشا، تۇرعىنداردىڭ وتىنىشىنە وراي بيىل اۋىلدارعا گاز تارتۋعا 50 ميلليون تەڭگە بولىنەدى. اتاپ ايتقاندا، بۇل شىلىكتى، تاسباستاۋ، جالشى جانە باسقا دا ءبىرقاتار ەلدى مەكەندەر.
«اۋدان حالقى ءتيىستى قاراجاتتىڭ قالاي جۇمسالىپ جاتقانى مەن اتقارىلعان جۇمىستاردىڭ جاي- كۇيىن ۇنەمى باقىلاپ وتىرۋى قاجەت. بۇل بيۋدجەت سوماسى بولىنەتىن قۇرىلىس، جول جوندەۋ سىندى جۇمىستاردىڭ ساپالى جۇرگىزىلۋىنە سەبەپ بولادى»، - دەيدى دانيال كەنجەتاي ۇلى.
سەرىك اقتانوۆتىڭ سوزىنشە، ەسەپتى كەزەڭنىڭ ەكونوميكالىق كورسەتكىشتەرى 2018 -جىلمەن سالىستىرعاندا ەداۋىر جوعارى. وتكەن جىلدىڭ قورىتىندىسى بويىنشا وبلىستا الەۋمەتتىك- ەكونوميكالىق دامۋدىڭ ءوسۋ ديناميكاسى ساقتالعان. وندىرىلگەن ءونىم مەن كورسەتىلگەن قىزمەت كولەمى 65 ميلليارد 260 ميلليون تەڭگەنى قۇرادى. وبلىس ەكونوميكاسىنا سالىنعان جالپى ينۆەستيتسيا مولشەرى 8 ميلليارد 673 تەڭگەگە جەتكەن.
اۋداندا مۇقتاج جاندارعا كومەكتەسۋگە كوپ كوڭىل بولىنۋدە. 2019 -جىلى 1173 وتباسىعا، ونىڭ ىشىندە 427 كوپبالالى وتباسىنا اتاۋلى الەۋمەتتىك كومەك تولەۋگە 658 ميلليون تەڭگە جۇمىلدىرىلدى. ورتاشا ەسەپپەن ءار وتباسىنا 560-600 مىڭ تەڭگە تولەنگەن.
«وبلىس اكىمىنىڭ تاپسىرماسىمەن اۋدانداعى اۋىلدىق وكرۋگتەردە تۇراتىن 11 كوپبالالى جانۇيا «پارىز» قورى ارقىلى باسپانالى بولدى. بيىل زايسان قالاسىنداعى بوقاجانوۆ كوشەسىندە 30 پاتەرلىك تۇرعىن ءۇي پايدالانۋعا بەرىلمەك. مۇنداعى 27 پاتەردە كوپبالالى وتباسىلار قونىس تويىن تويلايدى»، - دەدى سەرىك اقتانوۆ.
زايساندىقتار اۋدان جانە وبلىس باسشىسىنا ءبىرقاتار ماسەلەلەرىن جەتكىزدى.
ولار نەگىزىنەن اۋىل شارۋاشىلىعى سالاسىندا جەكە كاسىبىن باستاۋ ءۇشىن جەڭىلدەتىلگەن نەسيە الۋعا، الەۋمەتتىك قامسىزداندىرۋعا، جول جوندەۋگە جانە ەلدى مەكەندەردى اباتتاندىرۋعا قاتىستى بولدى. شقو اكىمى ءار تۇيتكىلدى مۇقيات تىڭداپ، الداعى ۋاقىتتا ءتيىستى شارالاردىڭ قابىلداناتىنىن ايتتى.
اۆتور: تالعاتجان مۇحامەتبەك ۇلى
