بيىل مارالدى كولىنە 50 مىڭعا جۋىق تۋريست كەلگەن
بۇل تۋرالى وڭىرلىك كوممۋنيكاتسيالار قىزمەتىندە وتكەن ءباپساسوز جيىنىندا شارباقتى اۋدانىنىڭ اكىمى ءازىلحان ابەۋوۆ ءمالىم ەتتى.
«بيىل مارالدى كولىنىڭ جاعاسىندا 50 مىڭعا جۋىق ادام دەمالدى، - دەدى ءازىلحان ابەۋوۆ. - بۇل كورسەتكىش وتكەن جىلعىدان تومەن. ول اۋا رايىمەن بايلانىستى دەپ ويلايمىز. ءبىز وبلىس اكىمىنىڭ تاپسىرماسىمەن مارالدى تۇزدى كولى جانە «شالداي» كۋرورتتىق اۋماعىنا قاتىستى ءتۋريزمدى دامىتۋدىڭ 3 جىلدىق جوسپارىن جاساپ قويدىق. جوسپار بويىنشا، مارالدى كولىنە كەلەتىن تۋريستەردىڭ سانىن 2023 -جىلعا دەيىن 150 مىڭعا جەتكىزبەكپىز» .
ەسكە سالايىق، مارالدى كولىنە 2018 -جىلى 60 مىڭ ادام كەلگەن بولاتىن. ال، 2017 -جىلى 35 مىڭ تۋريست دەمالعان. سپيكەردىڭ ايتۋىنشا، مارالدى كولىندەگى دەمالىس ورنىن دامىتۋ ءۇشىن بيىل ينۆەستور 150 ميلليون تەڭگە جۇمساعان.
«كۋرورت مارالدى» ج ش س كولدەگى ءتۋريزمدى دامتىۋمەن جۇمىس جاسايدى. بيىل ينۆەستور قوماقتى قارجىسىن قۇيدى. 3 جاڭا ءدامحانا سالىندى. الداعى ۋاقىتتا قۇزىرلى باسقارما ارقىلى تۇشى كولدى دە جەكە يەلىككە بەرىپ، وندا بالىق اۋلاۋدى دامىتپاقپىز» ، - دەدى اۋدان اكىمى.
ءازىلحان ابەۋوۆتىڭ ايتۋىنشا، كولگە جاقىن كولبۇلاق اۋىلىنىڭ تۇرعىندارى دا دەمالۋعا كەلگەن ادامدارعا ءۇيىن جالعا بەرىپ، پايدا تابا باستاعان.
«سونىمەن قاتار، جوسپار بويىنشا «قازاۆتوجولمەن» كەلىسىپ قويدىق. مارالدى ستانتسياسىنىڭ ماڭىنداعى رەسپۋبليكالىق جولدىڭ بولىگى جوندەلەدى. جول جارىقتاندىرىلىپ، ەلەكتر جۇيەسى مەن سۋ تارتىپ، جول بويىنداعى سەرۆيستى دامىتپاقپىز» ، - دەدى ءازىلحان ابەۋوۆ.
