جامبىلدىق بالىق ينسپەكتورلارى تالاس وزەنىندەگى 50 مىڭ شاباقتى امان الىپ قالدى

تاراز. قازاقپارات - جامبىل وبلىسىندا تالاس وزەنىندە بالىق ينسپەكسياسىنىڭ ماماندارى بالىقتاردىڭ جاپپاي قىرىلۋىنىڭ الدىن الىپ جاتىر، دەپ حابارلايدى قازاقپارات ءتىلشىسى.

ەسكە سالا كەتسەك، اپتاپ ىستىقتىڭ ۇدەپ، كورشىلەس قىرعىزستان تاراپىنان جىبەرىلەتىن سۋارۋعا ارنالعان سۋدىڭ ازايۋىنان تالاس وزەنى جاعاسىنىڭ كەيبىر بولىكتەرىندە بالىقتاردىڭ جاپپاي قىرىلۋى تىركەلگەن. الەۋمەتتىك جەلىدە تالاس اۋدانىندا تۇسىرىلگەن ۆيدەو تاراپ، ونداعى تۇرعىن تالاس وزەنىنىڭ تومەنگى اعىسىندا ويىق سۋ قويماسىنا 20 شاقىرىم جەردە مىڭداعان بالىقتىڭ قىرىلىپ جاتقانىن كورسەتەدى. ىستىقتىڭ سالدارىنان ءولى بالىقتاردىڭ از ۋاقىتتىڭ ىشىندە بۇزىلىپ جاتىر.

«قازىرگى تاڭدا بۇل جەردە شۇعىل توپتىڭ 30 ادامى جۇمىس جۇرگىزۋدە. تاعى ءبىر توپ جاقىندا كەلىپ قالۋى كەرەك. ىستىق بىزدە +45 گرادۋسقا بارادى. بۇگىنگە دەيىن التى ءتۇرلى 50 مىڭ شاباق قۇتقارىلدى. شاباقتاردى اۋلاپ الىپ، جاقىن ماڭداعى سۋ قويمالارىنا جىبەرىپ جاتىرمىز. 2500 ءولى بالىق كومىلدى. قىرعىز تاراپىنان كيروۆ سۋ قويماسىنان جەتكىلىكتى سۋ جىبەرىلمەگەندىكتەن، وسىنداي جاعداي تۋىنداپ وتىر. وبلىستىق باسقا سۋ قويمالارىندا احۋال تۇراقتى»، - دەيدى ق ر ا ش م ورمان شارۋاشىلىعى جانە جانۋارلار الەمى كوميتەتىنىڭ جامبىل وبلىستىق ينپەكسياسى بالىق شارۋاشىلىعى ءبولىمىنىڭ باسشىسى بولات اسانبەكوۆ.

بولات اسانبەكوۆتىڭ ايتۋىنشا، 5 -شىلدە كۇنى كيروۆ سۋ قويماسىنان تالاس وزەنىنە سەكۋندىنا 14 تەكشە مەتر سۋ جىبەرىلىپ تۇرعان. ال مەملەكەتارالىق كەلىسىمگە سايكەس بۇل مولشەر 52 تەكشە مەتر بولۋى كەرەك.

«شۋ- تالاس ينسپەكسياسىمەن جانە «قازسۋشارمەن» جۇمىس جۇرگىزىلدى. سۋدىڭ جىبەرىلۋ مولشەرى ارتىپ كەلەدى. قىرعىز تاراپىمەن ماسەلە رەتتەلىپ كەلەدى»، - دەيدى ول.

ايتا كەتسەك، جامبىل وبلىسىنا كەلەتىن سۋارۋعا ارنالعان سۋدىڭ 80 پايىزى ترانسشەكارالىق تالاس پەن شۋ وزەنى ارقىلى قىرعىزستان جاقتان كەلەدى. كورشىلەس ەلدەر ءۇشىن سۋ شارۋاشىلىعى تۇرعىسىنداعى ىنتىماقتاستىق ماسەلەسى مەن سۋارۋعا ارنالعان سۋدىڭ جەتكىلىكسىزدىگى جىلدار بويعى ءتۇيىندى ماسەلەگە اينالىپ كەلەدى.