07:55, 04 - قىركۇيەك 2017 | GMT +6
قىتايدا تەرەڭدىگى 50 مەتر ارىققا ءتۇسىپ كەتكەن ءسابيدى امان الىپ شىقتى - فوتو، كەسكىن
استانا. قازاقپارات - قىتايدا 10 نان استام ەكسكوۆاتور تەرەڭدىگى 50 مەتردەن اساتىن شۇڭقىرعا ءتۇسىپ كەتكەن ءسابيدى قۇتقاردى، دەپ جازادى life.ru.
وقيعا قىتايدىڭ شانشي پروۆينسياسىنا قاراستى شيان قالاسىندا بولعان. 1,5 جاسار ءسابيدى قۇتقارۋمەن 10 نان استام ەكسكوۆاتور اينالىستى. وپەراتسيا 10 ساعاتتان استام ۋاقىتقا سوزىلدى.
ءسابي اتاسىمەن جانە اپاسىمەن بىرگە قىدىرىپ شىعىپ، جەر استىنا قۇلاپ كەتكەن. بالا قۇلاعان سوڭ ول جەرگە توپىراق تۇسكەن. سوندىقتان اۋا بالاعا ديامەترى 3 س م بولاتىن كوزدەي عانا تەسىكتەن كەلىپ تۇرعان.
بالانى قۇتقارۋ بارىسىندا ادامدار 10 ساعات بويى ونىڭ اتىن اتاۋمەن بولدى. ونداعى ماقسات ءسابيدىڭ ۇيىقتاپ كەتۋىنە جول بەرمەۋ. وسى ۋاقىتتا ۇلكەن شۇڭقىر قازىلىپ، بالانى شىعارىپ الۋدىڭ مۇمكىندىگى تۋدى. قازىر ول اۋرۋحاناعا جاتقىزىلدى، العان جاراقاتتارى اۋىر ەمەس.