ورىس تىلىندە سويلەيتىندەر 50 ميلليونعا ازايدى
قالاي ايتقاندا بۇل زاڭدىلىق نارسە عوي، كەشەگى كەڭەس وداعىنىڭ شىققان مەملەكەتتەر تاۋەلسىزدىگىن الدى. قازىر دەربەس ساياساتىن جۇرگىزىپ وتىر. الايدا ماسكەۋدە وتىرىپ بۇرىنعى يمپەريالىق پيعىلدى كوكسەگەندەردىڭ قاتارى ءالى ازايار ەمەس.
- سوڭعى 25 جىلدا الەمدە ورىس تىلىندە سويلەيتىندەردىڭ قاتارى كۇرت ازايدى، 50 ميلليونعا جەتتى. بارعان سايىن بۇل تەندەنسيا جالعاسىپ كەلەدى. ءبىز بۇعان الاڭدايمىز. كەڭەس وداعىنىڭ كەزىندە وسى تەرريتوريادا ءومىر سۇرەتىن ۇلتتىڭ بارلىعى دا ورىس تىلىندە سويلەدى. اعا ۇرپاق قارتايدى، ولاردىڭ ورنىن جاس بۋىن باستى. ءبىراق ولار ورىس ءتىلىن كەرەك ەتپەيدى. ءوز ءتىلىن، اعىلشىن جانە تاعى باسقا تىلدەرگە قۇلشىنىس ارتتى.
بۇرىنعى كەزدە شىعىس ەۋروپانىڭ ءبىرقاتار ەلدەرىندە مەكتەپ باعدارلاماسىندا ورىس ءتىلى مىندەتتى ءپان رەتىندە وقىتىلىپ كەلدى. ال قازىر بۇل باعدارلاما الىنىپ تاستالدى. وتە وكىنىشتى، - دەپ مالىمدەدى مەملەكەتتىك دۋمانىڭ ءبىلىم جانە عىلىم جونىندەگى كوميتەتىنىڭ جەتەكشىسى ۆياچەسلاۆ نيكونوۆ.
بۇل ماسەلە رەسەي فەدەراتسياسى كەڭەسىنىڭ ءتورايىمى ۆالەنتينا ماتۆيەنكونىڭ ءبىر توپ مۇعالىمدەرمەن بولعان كەزدەسۋىندە ءمالىم ەتىلدى.
فەدەراتسيا كەڭەسىنىڭ ءتورايىمى «الداعى ۋاقىتتا ەۋرازيالىق وداقتىڭ كەڭىستىگىندە ورىس ءتىلىنىڭ اياسىن كەڭەيتىپ، ىقپالىن كۇشەيتۋ قاجەت» دەپ مالىمدەدى.
- ازىرگە تاجىكستاننىڭ عانا تەرريتورياسىندا ورىس ءتىلى مىندەتتى ءپان رەتىندە بەس رەت وقىتىلادى. ت م د مەملەكەتتەرىنىڭ باسقا ەلدەرىندە دە ورىس ءتىلى قاتار ءجۇرۋى كەرەك. جاقىن ارادا ورىس ءتىلىنىڭ ءبىر توپ مۇعالىمدەرىن تاجىكستانعا جىبەرەيىن دەپ وتىرمىز. مۇنداي ءادىستى باسقا دا ەلدەرگە قولدانۋىمىز كەرەك، - دەپ مالىمدەدى ۆالەنتينا ماتۆيەنكو.
...ماتۆيەنكو مازاسىزدانباي-اق قويسىن؟! قازاقستان دا قالىپ تۇرعان جوق. ءبىزدىڭ بيلىك تە ورىسشا سويلەيدى، ورىسشا ويلايدى. مەكتەپتە تە مىندەتتى ورىس ءتىلى ءپانى بار. قايتەمىز، وسى عوي، ەندى؟!.
بەرىك بەيسەن ۇلى
«ايقىن» گازەتى
