الماتى وبلىسىندا تاۋلىگىنە 50 مىڭ كولىك جۇرەتىن جول كەڭەيتىلمەك
وسى ماڭداعى كولىك كەپتەلىسىن شەشۋ ءۇشىن وبلىس اكىمدىگىنىڭ ۇسىنىسىمەن ۇكىمەت تاراپىنان قولداۋ تاپقان اۋقىمدى جوبا بيىلعى جىلى جۇزەگە اسىرىلا باستايدى. كۇردەلى جوندەۋ بارىسىندا جول ءۇستى كوپىرلەرى مەن جول بۇرىلىستارى دا قاراستىرىلماق.
بۇل تۋرالى كەشە جۋرناليستەرگە بەرگەن سۇحباتىندا وبلىس اكىمىنىڭ ورىنباسارى ايداربەك بايجانوۆ ايتتى.
«قازاۆتوجول» مەكەمەسىنىڭ الماتى وبلىستىق فيليالى ديرەكتورىنىڭ ورىنباسارى نۇرحات اقىلتايەۆتىڭ ايتۋىنشا، «التىن وردا» بازارى ماڭىنداعى اۆتوجول ارقىلى تاۋلىگىنە 50 مىڭ اۆتوكولىك جۇرەدى. مۇنداعى كەپتىلىس ماسەلەسىن شەشۋ ماقساتىندا اتالمىش جولدىڭ 16-19-شاقىرىمدارى ارالىعى 8 جانە 10 جولاقتى بولماق. ونىڭ ەكى جولاعى ترانزيتتىك كولىكتەرگە ارنالسا، ەكى جولاعى جەرگىلىكتى ماڭعا جۇرەتىن كولىكتەرگە، ال ءبىر جولاعى اۆتوبۋسقا، ياعني قوعامدىق كولىككە ارنالادى. 16- شاقىرىمدا بۇرىلىس ەستاكاداسى قاراستىرىلادى.
«الماتى - بىشكەك» اۆتوكولىك جولىنىڭ 786-790 شاقىرىم ۋچاسكەسى بولىگىن كەڭەيتۋدىڭ بۇعان دەيىنگى جوباسىنا بيىلعى جىلى ءبىرقاتار تولىقتىرۋلار ەنگىزىلگەن بولاتىن. اتاپ ايتقاندا، جوبانىڭ ەكىنشى كەزەڭىندە 18 مىڭ تۇرعىنى بار «اسىل ارمان» تك تۇرعىندارىنىڭ ءوتىنىشى بويىنشا اتالمىش كەشەننەن قالاعا بۇرىلاتىن «ترۋبا» ءتيپتى جەر ءۇستى جولى سالىنسا، سونىمەن قاتار رايىمبەك اۋىلى تۇسىندا تاعى ءبىر جوبا بويىنشا ءتورتىنشى جەر ءۇستى جولى قاراستىرىلاتىن بولادى.
جوبانىڭ ەكى كەزەڭىنىڭ دە جوباسىن «استاناسترويپروەكتسەرۆيس- م» ج ش س دايىنداۋدا. تامىز ايىنىڭ سوڭىنا دەيىن «مەمساراپتاما» مەكەمەسىنىڭ وڭ قورىتىندىسى شىعادى دەپ جوسپارلانعان. جوبانى تولىق جۇزەگە اسىرۋدىڭ الدىن الا ەسەپتەۋ بويىنشا قۇنى 12 ميلليارد تەڭگەگە جۋىق دەپ جوبالانىپ وتىر. بيىلعى جىلعا 800 ميلليون تەڭگە بولىنگەن. كۇردەلى جوندەۋ جۇمىستارى 2019 -جىلى تولىعىمەن اياقتالادى دەپ كۇتىلۋدە.
جوبانى ىسكە اسىرۋ ماقساتىندا مەملەكەت قاجەتتىلىگى ءۇشىن جەر تەلىمدەرىن الۋ جۇمىستارى جۇرگىزىلۋدە. الۋعا جاتاتىن وبلىس اۋماعىنداعى 53 ۋچاسكە بولسا، بۇگىنگى كۇنگە سونىڭ 5 ەۋى مەملەكەتتىك جەر ۋچاسكەسى، 30 ى الىنعان، 13 ىندە الۋ پروتسەسى ءجۇرىپ جاتىر، ال 5 جەر ۋچاسكەسىنىڭ يەلەرىمەن كەلىسسوزدەر جۇرگىزىلۋدە. وبلىس اكىمىنىڭ ورىنباسارى كۇردەلى جوندەۋ جۇمىستارى كەزىندە سول ماڭداعى ىرگەلى نىسانداردىڭ جۇمىسىنا كەدەرگى كەلتىرمەۋدى، ۋاقىتشا جولداردىڭ باعىتىن كەلىسىپ جاساۋدى تاپسىردى. «بۇل جوبا ءوز كەزەگىندە كولىك كەپتەلىسىن شەشۋگە، جاياۋ جۇرگىنشىلەردىڭ قاۋىپسىزدىگىنە وڭ ىقپالىن تيگىزەتىن بولادى»، - دەدى ا. بايجانوۆ.
