قازاقستان قوي ەتىنىڭ ەكسپورتىن 50 ەسەگە ارتتىرۋدى كوزدەيدى
بۇل تۋرالى بۇگىن ۇكىمەتتە وتكەن باسپا ءسوز ءماسليحاتىندا قر اۋىل شارۋاشىلىعى ۆيتسە- ءمينيسترى تولەۋتاي راحىمبەكوۆ ءمالىم ەتتى. «ينديكاتيۆتى مالىمەتتەر بويىنشا، 2021 - جىلعا قاراي قازاقستاندا قوي ەتىنىڭ ەكسپورتى 10 مىڭ تونناعا جەتەدى. 2016 -جىلى قازاقستان جالپى 191 توننا قوي ەتىن شەتەلگە جونەلتكەن. قازىر ءبىز جىل سايىن 150 مىڭ توننا قوي ەتىن وندىرەمىز. ىشكى تۇتىنۋ كولەمى - شامامەن 111 مىڭ توننا. ءبىز ءوزىمىزدىڭ قاجەتتىلىگىمىزدى 130-140 پروتسەنتكە وتەپ كەلەمىز. ياعني، ىشكى نارىققا قاجەتتى نورمادان 30-40 مىڭ تونناعا كوپ شىعارامىز. بىزگە ىشكى نارىققا نۇقسان كەلتىرمەي- اق 30-40 مىڭ توننا قوي ەتىن سىرتقا ەكسپورتتاۋعا بولادى» ، - دەدى ۆيتسە- مينيستر باسپا ءسوز ءماسليحاتىندا.
ونىڭ ايتۋىنشا، قازىر قازاقستان قوي ەتىن يرانعا تاسىمالداۋعا مۇمكىندىك الدى. سەبەبى يرانمەن بىرلەسكەن ۆەتەرينارلىق سەرتيفيكاتتار جاسالدى. اراب امىرلىكتەرىنە دە جول اشىق، قازىر يزرايل تاراپىمەن دە كەلىسسوزدەر جۇرگىزىلۋدە. ت. راحىمبەكوۆتىڭ سوزىنە قاراعاندا، قىتاي تاراپى قازاقستاننان قوي ەتىن الۋعا مۇددەلى. سەبەبى جىل ساناپ قىتايلىقتاردىڭ ازىق- تۇلىككە دەگەن سۇرانىسى ارتقان، ىشكى ونىمدەردىڭ كولەمى جەتكىلىكسىز. وسى ماقساتتا ءساۋىر ايىنىڭ سوڭىندا قىتايدان كەلگەن ارنايى ينسپەكتسيالىق توپ قىتاي نارىعى ءۇشىن جابىق قازاقستاننىڭ بەس وبلىسىنا تەكسەرىس جۇرگىزگەن. ەندى ماۋسىم ايىندا تۇبەگەيلى شەشىم شىعارىلسا، اتالمىش وبلىستاردان ەت تاسىمالداۋعا جول اشىلادى.
«قازاقستان قىتايدىڭ ازىق- تۇلىككە دەگەن سۇرانىسىن قامتاماسىز ەتە الادى دەپ ايتۋ قيىن. قىتايدا ءومىر ساپاسى ارتقان سايىن تاماقتانۋ مادەنيەتى دە وزگەرىپ جاتىر. بۇرىن وزدەرىڭىز بىلەسىزدەر، قىتاي حالقى ناندى وتە از تۇتىنادى. ەگەر قازىر ءاربىر قىتايلىق كۇنىنە ءبىر ءتىلىم نان جەيتىن بولسا، قىتايعا جىلىنا 25 ميلليون توننا ءبيداي قاجەت بولادى. ال قازاقستان جالپى 20 ملن توننا عانا استىق جينايدى» ، - دەپ اتاپ ءوتتى ول.
اۆتور: جاسۇلان جولدىبايەۆ