جاڭاقالالىق تۇرعىن سالماعى 50 ك گ جايىن ۇستادى

ورال. قازاقپارات - جاڭاقالا اۋدانى ماستەكساي اۋىلىنىڭ تۇرعىنى ءالىمباي ايعاليەۆ سالماعى 50 كەلى جايىن ۇستادى. بۇل تۋرالى جاڭاقالا اۋداندىق «جاڭارعان ءوڭىر» گازەتىنىڭ باس رەداكتورى ءومىرزاق اقباسوۆ جازدى.

 ماستەكسايلىق ءالىمباي ايعاليەۆ كاسىبي بالىقشى ەمەس. دەسە دە، بار ءومىرى بالىعى تايداي تۋلاعان قاراوزەننىڭ جاعاسىندا ءوتىپ جاتقاندىقتان، وقتا- تەكتە جايىنعا قارماق لاقتىرماي جۇرمەيدى. بىردە ءىرىسى، بىردە ۋاعى دەگەندەي، قۇر قول قايتپايدى ايتەۋىر.

 بيىل دا وزەن مۇزى ەرىپ بولعان تۇستا، اۋىل تۇسىنداعى وزەنگە جەمىن شانشىپ، قارماق قۇردى. كۇن ءالى سالقىن، بالىق ۋىلدىرىق شاشۋعا ەرتە، اۋلاۋعا تىيىم سالىنباعان كەز. ولجالى بولام دەگەن دامەسى از ەدى. ەرتەسىنە ساۋمالاپ قاراعان قارماعى اۋىر تارتتى. ىلىككەن كىشىلەۋ نارسە ەمەس. قارماق باۋى مىقتى ەدى. ءبىراز الىسىپ، قارماعىن قاپقان جايىندى جاعاعا ءاۋپىرىم دەپ ارەڭ شىعاردى. ولجا دەپ وسىنى ايت! ءداۋ جايىن، ۇزىندىعى ەكى مەتر شاماسىندا. سالماعى 50 كەلىدەن اسىپتى. ءسويتىپ، جاسى الپىستان اسقان اۋىل ازاماتى ۇلكەن ولجاعا كەنەلسەم دەگەن ءبىر مۇراتىنا جەتتى. ولجانى قىزىق كورىپ، تاماشالاعان اۋىلداستارى از بولعان جوق.

 اۆتور: ەلجان ەرالى