استانادا 50 مەترلىك قايىرىمدىلىق داستارحانى جايىلدى - فوتو
قايىرىمدىلىق شارادان تۇسكەن بارلىق قاراجاتتى قاتەرلى ىسىك اۋرۋىنا شالدىققان التى جاسار ايىمجان دوسجاننىڭ ەم-دومىنا اۋدارۋ جوسپارلانىپ وتىر، دەپ حابارلايدى قازاقپارات ءتىلشىسى. «قازاقستان حالقى اسسامبلەياسىنىڭ استانالىق بولىمشەسى ءدال مامىردىڭ 1- كۇنى بۇنداي قايىرىمدىلىق شاراسىن العاش رەت ۇيىمداستىرىپ وتىر. بۇعان دەيىن دە تالاي شارالار ۇيىمداستىرىلدى. ءبىز ناقتى ءبىر بالانى تاڭداپ، كومەك بەرۋگە تىرىسامىز.
ماسەلەن، بۇگىن كىشكەنتاي ايىمجان دوسجانعا اقشا جيناپ جاتىرمىز. ونى گەرمانيادا ەمدەۋ ءۇشىن 150 مىڭ ەۋرو قاجەت. وسى ۋاقىتقا دەيىن باسقا ايماقتاردا قايىرىمدىلىق اكسيالارى وتكەن بولاتىن. بۇل جولى ءبىز دە ءوز ۇلەسىمىزدى قوسقاندى ءجون كوردىك. وسىلايشا، سان الۋان ۇلتتىڭ وكىلدەرى بىرلىك كۇنىن ءسوز جۇزىندە ەمەس، ءىس جۇزىندە اتاپ وتىر. جالپى، سوڭعى ەكى جىل بولدى، قازاقستان حالقى اسسامبلەياسى قايىرىمدىلىق شارالارىن بەلسەندى تۇردە وتكىزىپ كەلەدى. وسىنىڭ ءوزى ۇيىمنىڭ وزگەگە كومەك بەرە الاتىن دەڭگەيگە جەتكەنىن كورسەتسە كەرەك»، - دەدى استانا قالالىق قازاقستان حالقى اسسامبلەياسى حاتشىلىعىنىڭ مەڭگەرۋشىسى ءلاززات قۇسايىنوۆا قازاقپارات تىلشىسىنە بەرگەن سۇحباتىندا.
بۇگىنگى قايىرىمدىلىق داستارحانىندا سان الۋان ۇلتتاردىڭ تاعامدارىنان ءدام تاتۋعا مۇمكىندىك بار. باعاسى دا قىمبات ەمەس. بۇل جەردە حالتىمىش، چاپيلگيش، بيرح، دۋك سياقتى شەشەن- ينگۋش تاعامدارى، كارىس سالاتتارىنىڭ بەس ءتۇرى، كاديۋري، تيمپەني (كۇرىش نانى)، ازەربايجاندار ۇسىنعان حامپلوۆ، دولما، كەباب، ليۋليا- كەباب، لاۆاش، گۋتاب، نەمىستىڭ شترۋدەلى مەن كرەبەلى، وزبەك پەن قاراقالپاقتىڭ پالاۋى، پولياك حالقىنىڭ بيگۋسى، ارمياندار ءپىسىرىپ الىپ كەلگەن حاچاپۋري، دولما، لاۆاش، ۋكراين حالقىنىڭ ۆارەنيكتەرى، تاتاردىڭ ءبالىشى، قىستىبىي، تاتارشا ازۋ، ۋچپۋچماك پەن وراما، دۇنگەندەر جاساعان لاعمان، گانفان، مانتى، ورىستاردىڭ بالىشتەرى مەن قۇيماقتارى، تۇرىكتەردىڭ ءوز قولىمەن جاساعان پيدە، لاحماندۋن، سيگارا بورەك، ياپراكسارما، اداناكەباب پەن دونەر، داعىستان حالقىنىڭ حينكالى، سامساسى مەن چۋدۋسى، تۇركىمەندەر الىپ كەلگەن كۋتاب، چەكتەرمە بار.
گرۋزيندار بولسا، بورجومي، ۆينو، حاچيپۋري، ليموناد، ءتىپتى چا- چاسىن دا الىپ كەلگەن. «ماڭگىلىك ەل» الاڭىنداعى مەرەكەلىك شارالار اياسىندا قازاق كۇرەسى، ارقان تارتۋ مەن اسىق اتۋدان سايىستار ۇيىمداستىرىلدى. ال ۇلكەن ساحانادا ەتنومادەني بىرلەستىكتەردىڭ كونسەرتى ءوتىپ جاتىر.
اۆتور: ارمان اسقاروۆ
