باياناۋىلدا 50 دومبىراشى ءبىر مەزەتتە «اتا تولعاۋى» كۇيىن ورىندايدى

استانا. قازاقپارات -  ۇلىستىڭ ۇلى كۇنى العاش رەت باياناۋىل اۋدانىندا بۇركىتشىلەر مەن دومبىراشىلار شەرۋى وتەدى.

بۇل تۋرالى اگەنتتىككە اۋداندىق ىشكى ساياسات ءبولىمىنىڭ باسشىسى تالعات قالىشبەكوۆ ءمالىم ەتتى، دەپ حابارلايدى pavlodarnews.kz.

- قۇسبەگىلەردىڭ لەگىن شىعىس قازاقستان وبلىسى اياگوز قالاسىندا وتكەن Ⅺ رەسپۋبليكالىق «قانسونار-2017» چەمپيوناتىنىڭ جەڭىمپازى باقىتجان مۇقاشيەۆ پەن ەلىمىزگە بەلگىلى بۇركىتشى يمانزايىپ تاسىبايەۆ باستايدى.

ولاردىڭ سوڭىنان ەرگەن 50 دومبىراشى ءبىر مەزەتتە نۇرعيسا تىلەنديەۆتىڭ «اتا تولعاۋى» كۇيىن ورىندايدى. بۇل كۇنى جەرگىلىكتى مەكەمە- ۇيىمداردىڭ دەمەۋشىلىگمەن 300 ليتر ناۋرىز كوجە مەن 100 كەلى باۋىرساق، پالاۋ تەگىن تاراتىلادى.

اسىرەسە، تۇرمىسى تومەن، جەتىم جانە از قامتاماسىز ەتىلگەن وتباسىلارعا ەرەكشە كوڭىل بولىنەدى. بۇدان باسقا، جىلداعى ءداستۇر بويىنشا ۇلتتىق سپورت ويىندارى مەن مەرەكەلىك ساۋدا-ساتتىق وتەدى، - دەيدى تالعات قالىشبەكوۆ.

 ءبولىم باسشىسىنىڭ ايتۋىنشا، ءبىلىم بەرۋ وردالارى مەن اكىمدىكتىڭ بولىمدەرى سۇلتانماحمۇت تورايعىروۆ، الكەي مارعۇلان، جۇسىپبەك ايماۋىتوۆ سىندى بەلگىلى جەرلەستەرىنىڭ اتىمەن اتالاتىن 10 كيىز ءۇي تۇرعىزادى. ونىڭ ىشىندە بيىل العاش رەت اۋداندىق ءماليحاتتىڭ دەپۋتاتى ورال سارتايەۆتىڭ باستاماسىمەن كاسىپكەرلەر جەكە كيىز ءۇي تىگۋگە نيەت بىلدىرگەن.