جاپونيادا تولىق ەمەس وتباسىلار اراسىندا كەدەيلىك كەبىن كيگەندەر 50 پايىزعا جەتتى

استانا. قازاقپارات -  جاپون بيلىگى جاقىندا عانا 2017 -جىلعا ارنالعان قارجى بيۋدجەتىن بەكىتتى. 830 ميلليارد ا ق ش دوللارىنىڭ ءبىر بولىگى بالالاردى تاربيەلەۋگە جۇمسالماق. ۇكىمەتتىڭ بۇل ماسەلەگە باسا نازار اۋدارۋى بەكەر ەمەس.

 ويتكەنى كۇنشىعىس ەلىندەگى الەۋمەتتىك باعدارلامالاردىڭ دەنى قارت ادامدارعا كومەك كورسەتۋدى كوزدەيدى. جاپونيادا ءاربىر التىنشى وقۋشى تۇرمىسى تومەن وتباسىندا ءومىر سۇرەدى.

دەمەك ول جانۇيانىڭ كىرىسى ورتاشا تابىس كولەمىنىڭ جارتىسىنان از. كۇنشىعىس ەلىندە بۇل كورسەتكىش 16 پايىزدى قۇرايدى. ودان ەڭ الدىمەن جالعىزباستى اتا- انالار زارداپ شەگىپ وتىر. ويتكەنى بۇگىندە جاپونيادا تولىق ەمەس وتباسىلار اراسىندا كەدەيلىك كەبىن كيگەندەر 50 پايىزعا دەيىن جەتەدى. جاپونياداعى ءزاۋلىم عيماراتتار اراسىندا كەدەي اۋداندار جوقتىڭ قاسى. قاڭعىباستار دا سيرەك كەزدەسەدى. دەسە دە ەل اۋماعىندا بالالارعا ارنالعان ارنايى ءدامحانالار كوبەيىپ كەتتى. تاماق تانۋ ورىندارىن سالۋعا ۇكىمەتتىك ەمەس ۇيىمدار مەن ەرىكتىلەر مۇرىندىق بولدى. بالالار مۇندا ارزان تاماق ءىشۋ ءۇشىن كەلەدى. 2012 -جىلى ولاردىڭ سانى 10-عا جەتەر- جەتپەس بولسا، بيىل 200-دەن اسىپ جىعىلادى. نەگىزى، بۇل ەلدە كەدەيلىك تۋرالى كوپ ايتىلمايدى. ويتكەنى از اقشا تابۋ جاپونيادا ۇياتتى سانالادى. سوندىقتان اتا- انالار بالالارىن قاتارلاستارىنان قالدىرماي، بار تاپقانىن باۋىر ەتى بالاسىنا جۇمساۋدان ايانبايدى.

www.24.kz