اقتاۋدا بولاشاق ۇرپاققا امانات ەتىلىپ، 50 جىل بۇرىن جازىلعان حات اشىلادى
اباي اتىنداعى مادەني ورتالىقتىڭ الدىنا ورناتىلعان ەسكەرتكىش ستەلا وسى كۇنى اقتاۋ قالاسىنىڭ تۇرعىندارى مەن قوناقتارىنىڭ نازارىن وزىنە اۋدارتۋدا. ماڭعىشلاقتى يگەرگەن ازاماتتاردىڭ اماناتى بويىنشا كەلەشەك ۇرپاققا ارنالعان كاپسۋلا 2017 -جىلدىڭ 7 -قاراشاسى كۇنى اشىلۋى ءتيىس.
ستەلادا: «ماڭعىشلاقتى يگەرۋشىلەردەن 2017 -جىلدىڭ ۇرپاقتارىنا»، دەپ جازىلعان. ونىڭ ەكىنشى بەتىندە كاپسۋلا ورناتىلعان داتا - 1967 -جىلدىڭ 7 -قاراشاسى جانە «2017 -جىلدىڭ 7 -قاراشاسى كۇنى اشۋ» دەگەن جازۋ بار. ءۇشىنشى جاعىنا وراق پەن بالعانىڭ سۋرەتى ويىپ سالىنعان.
كاپسۋلا ورناتىلعان كۇن تۋرالى ەستەلىكتەرىمەن ليۋدميلا نيكولايەۆنا مۋحورتوۆا بولىسۋدە. ول كەزدە ول شەۆچەنكو قالالىق حالىق دەپۋتاتتارى كەڭەسى اتقارۋشى كوميتەتىنىڭ ءبولىم باسشىسى بولىپ قىزمەت ەتكەن.
«2017 -جىلدىڭ قاراشاسىندا بولاشاققا ارنالعان حات سالىنعان كاپسۋلانىڭ ورناتىلعانىنا 50 جىل تولادى. بۇل شارا 1967 -جىلدىڭ 7 -قاراشاسىندا ۇلى وكتيابر رەۆوليۋتسياسىنا 50 جىل تولۋىن اتاپ وتۋگە ورايلاستىرىلدى»، - دەيدى ليۋدميلا نيكوليەۆنا.
ونىڭ ايتۋىنشا، كاپسۋلانى ورناتۋ شاراسى سالتاناتتى جاعدايدا ءوتتى. وعان سوتسياليستىك ەڭبەك ەرى اتاعىنا يە ازاماتتار، ءوندىرىس وزاتتارى، مۇنايشىلار، ۇستازدار مەن №1, №4 جانە №5 -مەكتەپتەردىڭ وقۋشىلارى شاقىرىلدى.
ۇرپاققا ارنالعان حاتتى №1 -مەكتەپتىڭ وقۋ وزاتتارى ارتۋر كاماليدەنوۆ پەن مارينا وستاپەنكو الدىمەن جينالعان جۇرتقا وقىپ بەرىپ، كەيىن كاپسۋلاعا سالعان.
