قازاقستاننان جىل سايىن الەۋمەتتىك جاردەماقى رەتىندە سىرتقا 50 ميلليون تەڭگە شىعارىلادى
ايماقتا قالىپتاسقان جاعداي مەن ول ماسەلەلەردى قاداعالاۋشى ورگاننىڭ قالاي شەشىپ جاتقاندىعى تۋرالى «قازاقپارات» ح ا ا- ءنىڭ تىلشىسىنە وبلىس پروكۋراتۋراسىنىڭ باسقارما باستىعى داۋرەن كوبەيەۆ ايتىپ بەردى.
«قازاقستاننىڭ قىرعىزستانمەن شەكتەسەتىن ەڭ ۇزاق ايماعى جامبىل وبلىسىندا جاتىر. وسى ورايدا بىزدە «كوشى- قون ۇدەرىستەرىنىڭ قاۋىپسىزدىگى» اتتى جوبا ىسكە قوسىلعان. ناقتى مالىمەتتەرگە سۇيەنەتىن بولساق، سوڭعى 3 جىل ىشىندە قازاقستاننىڭ ازاماتتىعىن قىرعىزستاننىڭ 3 مىڭ تۇرعىنى الدى. قازاقستان ايماعىندا تۇراقتى تۇرۋ قۇقىعىنا 25 مىڭ ادام يە بولدى. ەگەر 2014-2015 -جىلدار ارالىعىندا مۇنداي ازاماتتار سانى 8 مىڭ بولسا، تۋرا وسى كورسەتكىش بيىلعى جىلدىڭ 8 ايىندا تىركەلدى. بۇل قازاقتاننىڭ پوست كەڭەستىك مەملەكەتتەردىڭ اراسىندا الەۋمەتىك- ەكونوميكالىق جاعدايى ەڭ قۋاتتى ەلدەردىڭ ءبىرى ەكەندىگىنىڭ كورسەتكىشى بولسا كەرەك. سوندىقتان دا قازاقستانعا وزگە مەمەكەتتەردىڭ ازاماتتارى ءۇيىر.
قازاقستان كونستيتۋتسياسىنىڭ 3 - بابىندا ەلىمىزدىڭ ازاماتتارىنا وزگە مەملەكەتتىڭ ازاماتتىعىن الۋعا تىيىم سالىنعان. الايدا، كوشى- قون ورگاندارىنىڭ قىرعىز رەسپۋبليكاسىنىڭ وكىلەتتى ورگاندارىمەن جۇرگىزىلگەن مالىمەتتەردى سالىستىرۋ جۇمىستارى بارىسىندا ەكى ازاماتتىق الۋدىڭ 76 جاعدايى تىركەلدى. وسى انىقتالعان ازاماتتار ەكى ەلدىڭ ايماعىندا ەمىن- ەركىن جۇرەتىن بولعان. ولاردىڭ كەيبىرى ءتىپتى قازاقستانداعى الەۋمەتتىك جەڭىلدىكتەردى دە پايدالانىپ كەلگەن»، - دەدى پروكۋراتۋرا وكىلى.
ونىڭ ايتۋىنشا، انىقتالعان فاكتىلەر بويىنشا، وبلىستىق ءى ءى د- نە ءتيىستى شارا قولدانۋ جونىندە تاپسىرما بەرىلگەن. وسى ماسەلە بويىنشا قازىر ءار اۋداندا ارنايى جۇمىس توپتارى قۇرىلىپ، الەۋمەتتىك جاردەماقى تۇرىندە ەلىمىزدەن قارجى الىپ كەتۋ ارەكەتتەرى انىقتالۋدا. الدىن الا قورىتىندى بويىنشا، پروكۋراتۋرا نازارعا العان زاڭ بۇزۋ جاعدايلارى بويىنشا تاعى 42 فاكتى ءمالىم بولعان.
«قورداي اۋدانىنىڭ قىرعىزستانمەن شەكتەسەتىن سورتوبە، ماسانشى جانە اۋقاتتى ەلدى مەكەندەرىندە ءىس جۇزىندە قىرعىزستاندا تۇرىپ جاتقان 4 مىڭنان استام ازامات انىقتالدى. تەك سورتوبە اۋىلىندا عانا قازاقستاندا تۇرۋ قۇقىعىنا يە بولعان، الايدا وزدەرى قىرعىزستاندا تۇرىپ جاتقان 2400 ازامات انىقتالدى. الدىن الا مالىمەتتەر بويىنشا، وسىنداي ارەكەتتەردىڭ سالدارىنان ەلىمىزدىڭ ايماعىنان شىعارىلعان قارجى كولەمى 50 ميلليون تەڭگەدەن اسىپ جىعىلادى»، - دەيدى كوبەيەۆ.
ول كەلتىرگەن مالىمەتتەر بويىنشا، تەكسەرۋ جۇمىستارى ەلىمىزدىڭ ازاماتتىعىن العان كەيبىر ازاماتتاردىڭ قازاقستانعا تەك الەۋمەتتىك جەڭىلدىكتەردى الۋ ءۇشىن 3-4 ساعاتقا عانا كەلىپ جۇرگەندەرىن انىقتادى.
«ءبىز ءتىپتى بۇگىنگى زاڭ تەرمينولوگياسىندا جوق ءۇش ازاماتتىق الۋ ارەكەتتەرىنىڭ دە كۋاسى بولىپ وتىرمىز. قورداي اۋدانىندا قازاقستان جانە قىرعىزستانمەن قاتار رەسەيدىڭ ازاماتتىعىن دا الىپ العان ادامدار بەلگىلى بولدى. ولار ءار مەملەكەتتىڭ ايماعىنا وتەردە سول ەلدىڭ ازاماتى ەكەندىگىن راستايتىن قۇجاتتاردى كورسەتىپ جۇرە بەرگەن»، - دەپ قوستى وبلىس پروكۋراتۋراسىنىڭ باسقارما باستىعى.
