ۇلتتىق مۋزەيدە الەمگە ايگىلى جۋرنالدىڭ ۇزدىك 50 سۋرەتى اتتى كورمە اشىلدى - فوتو
كورمە ورتالىق ازيا وڭىرىندە تۇڭعىش رەت جارىق كورگەن «National Geographic قازاقستان» جۋرنالىنىڭ تۇساۋكەسەرى اياسىندا ۇيىمداستىرىلىپ وتىر.
شاراعا «National Geographic» حالىقارالىق جۋرنالىنىڭ ۆاشينگتوننان كەلگەن باسشىلىعى، شەتەلدىك مەيماندار، ق ر پارلامەنتىنىڭ دەپۋتاتتارى، ەلىمىزدەگى ديپلوماتيالىق كورپۋس وكىلدەرى، عالىمدار مەن زيالى قاۋىم، بيزنەس- قاۋىمداستىق مۇشەلەرى، مەملەكەتتىك ورگان قىزمەتكەرلەرى جانە ت. ب. قاتىستى. جۋرنالدىڭ تۇساۋكەسەر راسىمىنە ارنالعان باسپا ءسوز ءماسليحاتىن ق ر اقپارات جانە كوممۋنيكاتسيا ءمينيسترى داۋرەن ابايەۆ قۇتتىقتاۋ ءسوز سويلەپ اشتى.
«National Geographic» حالىقارالىق جۋرنالىنىڭ جاۋاپتى رەداكتورلارىنىڭ ءبىرى، باسىلىم ديرەكتورىنىڭ ورىنباسارى داررەن سميت قازاقستان تۋرالى مۇراعاتتان الىنعان ماقالالارعا توقتالسا، جۋرنالدىڭ ماركەتينگ ديرەكتورى اريەل لور ايگىلى برەندتىڭ تاريحىنا شولۋ جاسادى. سونداي-اق، «National Geographic قازاقستان» جۋرنالىنىڭ باس رەداكتورى ەركىن جاقىپوۆ جەرگىلىكتى رەداكسيانىڭ ۇستانعان باعىتى مەن الداعى جوسپارلارى تۋرالى ايتىپ ءوتتى.
ايتا كەتەرلىك ەرەكشە جايت، شاراعا بۇگىندە جاسى 80 نەن اسقان فازيلا جانالتاي اجە قۇرمەتتى قوناق رەتىندە شاقىرىلدى.
ول كىسىنىڭ سۋرەتى «National Geographic» جۋرنالىنىڭ 1954 -جىلى شىققان سانىندا جاريالانعان ەكەن. قىتايداعى بوسقىن قازاقتار تۋرالى ماقالادا سولتۇستىك التايدان باستاپ، تۇركياعا تابان تىرەگەن جۇرتتىڭ ايانىشتى ءومىرى باياندالعان. تاعدىردىڭ تاۋقىمەتىن تارتىپ، تاريحتىڭ ءتىرى كۋاگەرىنە اينالعان قارت اجەي، بۇگىندە تارىداي شاشىلعان سول كوشتىڭ كوزى ءتىرى، ساناۋلى وكىلىنىڭ ءبىرى سانالادى. اتامەكەنىنە ورالعان كەيۋانا قازىر استانا قالاسىندا تۇرادى.
ۇلتتىق مۋزەيدە ەكى ايعا جالعاساتىن «National Geographic تىڭ» ۇزدىك 50 سۋرەتى» اتتى فوتوكورمەدە 128 جىلدىق تاريحى بار بەدەلدى باسىلىمنىڭ الەمدى وزگەرتكەن ەڭ ۇزدىك فوتولارى ۇسىنىلعان. وندا ستيۆ ماككارريدىڭ دۇنيەنى شارلاعان ايگىلى «اۋعان قىزى» سۋرەتىنەن باستاپ، دجەين گۋدوللدىڭ تاڭعاجايىپ كادرلارى، توماس ابەركرومبيدىڭ 1965 -جىلى تۇسىرىلگەن مەككە كورىنىسى جانە «National Geographic» تاريحىنداعى باسقا دا تانىمال فوتوتۋىندىلار پاش ەتىلدى.
سونداي-اق، كەلۋشىلەر 10000 ۆاتتىق جارىقپەن 4022 مەتر تەرەڭدىكتە ەموري كريستوف «تىرىلتكەن» تيتانيكتىڭ سۋرەتىنە ءتانتى بولىپ، كەرەمەت اسەرگە بولەندى.
ايتا كەتەيىك، «National Geographic» - الەمدەگى ەڭ بەدەلدى قوعامدىق ۇجىمداردىڭ ءبىرى. نەگىزى ⅩⅨ عاسىردا قالانعان برەندتىڭ مەنشىگىنە ءبىرقاتار تەلەارنالار، جۋرنالدار، باسپا ۇيلەرى كىرەدى. «National Geographic تىڭ» بۇگىندە الەم بويىنشا 600 ميلليون اۋديتورياسى بار. 128 جىلدا قوعام عىلىمي- زەرتتەۋ جۇمىستارىنا 11000 گرانت ءبولدى. باسىلىم بەتىندەگى ماقالالار شىنايى ءارى تۇبەگەيلى عىلىمي زەرتتەۋلەرگە نەگىزدەلگەن. باسىلىم الەمنىڭ 38 تىلىندە، 80 نەن استام ەلگە تارايدى جانە عالامشاردى ايالاۋدى ناسيحاتتاپ، ونى قورعاۋعا ۇندەيدى، جەر شارىنىڭ قايتالانباس تابيعاتىنىڭ ادەمىلىگىن ساقتاۋعا شاقىرادى.
اۆتور: قانات مامەتقازى ۇلى
