ق. توقايەۆ ب ۇ ۇ دامۋ باعدارلاماسىنىڭ 50 جىلدىعىمەن قۇتتىقتادى

استانا. قازاقپارات - قازاقستان رەسپۋبليكاسى پارلامەنتى سەناتىنىڭ ءتوراعاسى قاسىم-جومارت توقايەۆ بىرىككەن ۇلتتار ۇيىمى باس حاتشىسىنىڭ كومەكشىسى، ب ۇ ۇ دامۋ باعدارلاماسىنىڭ(د ب) ەۋروپا جانە ت م د ەلدەرى بويىنشا ايماقتىق بيۋروسىنىڭ ديرەكتورى دجيحان سۋلتانوگلۋدى قابىلدادى.

كەزدەسۋ بارىسىندا ق. توقايەۆ ب ۇ ۇ د ب وكىلىن وسى قۇرىلىمنىڭ 50 جىلدىعىمەن قۇتتىقتادى. «دامۋ باعدارلاماسى ادامزاتتىڭ ورنىقتى دامۋىن، ونىڭ ىشىندە كەدەيلىكتى تۇبىرىمەن جويۋ، جۇمىسپەن قامتۋدى ۇلعايتۋ جانە تۇرعىنداردىڭ ءومىر ءسۇرۋ دەڭگەيىن ارتتىرۋ، ءبىلىم بەرۋ جۇيەسىن جاقسارتۋ، قورشاعان ورتانى قورعاۋ جانە قالپىنا كەلتىرۋدى قامتاماسىز ەتۋدە ورتالىق ءرولدى اتقارادى». جيىرما ءۇش جىل بويى ب ۇ ۇ د ب قازاقستانداعى رەفورمالار مەن ترانسفورماتسيالاۋعا ەلەۋلى ۇلەس قوسىپ كەلەدى»، - دەدى ق. توقايەۆ.

ءتوراعا ب ۇ ۇ د ب جارتى عاسىرلىق قىزمەتىنىڭ ناتيجەلەرى مەن ورنىقتى دامۋدىڭ 2030 -جىلعا دەيىنگى ماقساتتارىن ىسكە اسىرۋ كەلەشەگى استانا ەكونوميكالىق فورۋمى اياسىنداعى ارناۋلى سەسسيادا ىقىلاسپەن تالقىلاناتىنىنا سەنىم ارتتى.

سەنات ءتوراعاسى سول كۇنى ب ۇ ۇ باس حاتشىسىنىڭ ارناۋلى وكىلى، ب ۇ ۇ ورتالىق ازيا ەلدەرىنە ارنالعان پريۆەنتيۆتىك ديپلوماتيا جونىندەگى ايماقتىق ورتالىعىنىڭ باسشىسى پەتكو دراگانوۆپەن كەزدەسۋ وتكىزدى. جۇزدەسۋشىلەر ايماقتاعى ب ۇ ۇ قىزمەتىن، ەكونوميكالىق ىنتىماقتاستىق، ترانسۇلتتىق قاۋىپتەرگە قارسى ءىس- قيمىل، سونداي-اق «ەكسپو-2017» حالىقارالىق كورمەسىنە ازىرلىك ماسەلەلەرىن تالقىلادى.

اۆتور: سەرىك قاراجان