ەۋرووداق ءار ميگرانتقا 50 ەۋرودان سالىق سالۋدى كوزدەپ وتىر
يتاليا پرەمەرى ماتتەو رەنسي مەن گەرمانيا كانتسلەرى انگەلا مەركەل ريمدە اتالعان ستراتەگيانى تالقىلادى.
يتاليا پرەمەرى ماتتەو رەنسي، انگەلا مەركەلدى نيەتتەس ارىپتەسى رەتىندە قابىلدادى. قوس ەلدىڭ كوشى- قونعا قاتىستى كوزقاراسى ۇندەسىپ جاتىر، دەپ جازادى 24.kz.
ريم افريكا ەلدەرىنىڭ ەكونوميكاسىنا قارجى قۇيۋ، ينفراقۇرىلىم جاساقتاۋ، جاڭا تەحنولوگيالاردى ەنگىزۋدى ۇسىنىپ وتىر، ال قارا قۇرلىق ءوز كەزەگىندە ميگرانتتار ءنوپىرىن بوگەۋى كەرەك. افريكالىق باعىتتى جابۋ ءۇشىن بالقاندا قولدانىلعان ستراتەگيا قاجەت. افريكاعا ينۆەستيتسيا سالعانى ءجون. ەگەر پروبلەمانى الداعى بىرنەشە جىلدا شەشۋدى قالاساق، جاڭا جۇمىس ورىندارىن اشىپ، دامۋعا ۇلەس قوسۋ كەرەك. بۇل تۇرعىدا انگەلا ەكەۋمىزدىڭ ويىمىز ءبىر جەردەن شىعادى، - دەيدى يتاليا مينيسترلەر كەڭەسىنىڭ پرەزيدەنتى ماتتەو رەنتسي.
بۇل جوسپاردى ەۋرووداق ەلدەرىنىڭ باسىم بولىگى قۋاتتايدى. ءبىراق بۇل شاراعا شامامەن 15 ميلليارد ەۋرو قاجەت. ەۋروپا قورلارى بۇل قارجىنىڭ جارتىسىن عانا وتەي الادى. قوسىمشا قارجى تابۋدىڭ بىرنەشە جولى بار. ءبىرى - شەتەلدىكتەر ءۇشىن 50 ەۋرو كولەمىندە سالىق ەنگىزۋ. بۇل شارا ەۋروپاعا كەلگەندەردىڭ بارىنە قاتىستى بولماق جانە ۆيزا تولەمىنە كىرەدى. ەكىنشىسى - ەۋروپالىق قالالارعا ۇشاققا الىنعان ءار بيلەت اقىسىنا 10 ەۋرو قوسۋ. بۇل تابىس كوزدەرىنەن ەۋرووداق قازىناسىنا 4 ميلليارد ەۋرودان استام كىرىس كىرەر ەدى. ەۋرووداق ەلدەرى بۇل ستراتەگيانى ءالى جان- جاقتى تالقىلاۋى كەرەك. ال نيگەر زاڭسىز كوشى- قوننىڭ جولىن بوگەۋ ءۇشىن ءقازىردىڭ وزىندە 1 ميلليارد ەۋرو سۇراپ وتىر. الەمدەگى ەڭ كەدەي ەلدەردىڭ قاتارىنا جاتاتىن مەملەكەتتىڭ اۋماعى - افريكالىق ميگرانتتاردىڭ باستى وتكەلدەرىنىڭ ءبىرى. گەرمانيا مەن فرانتسيا سىرتقى ىستەر مينيسترلەرى تاياۋدا وسى نيگەردە بولىپ قايتقان.
- ءبىز فرانسۋز جانە نەمىس مينيسترلەرىنىڭ ەلىمىزگە كەلگەنىنە وتە رازىمىز. ولارمەن ەكونوميكانى دامىتۋ، قاۋىپسىزدىك، قارىم- قاتىناسىمىزدى نىعايتۋ جانە كوشى-قون تۋرالى سويلەستىك. سەبەبى بۇل تەك ەۋروپا ەلدەرى ءۇشىن عانا ەمەس، سونداي-اق ءبىز ءۇشىن دە ۇلكەن پروبلەما» - دەپ ءمالىم ەتتى نيگەر رەسپۋبليكاسىنىڭ سىرتقى ىستەر ءمينيسترى: يبراگيم ياكۋبا.
اتالعان ستراتەگيادا تاعى دا ءبىر شارت بار. ەۋرووداق ەكونوميكالىق ميگرانتتاردى كۆوتالار بويىنشا قابىلداۋعا مىندەتتەلەدى. ماتتەو رەنتسي مەن انگەلا مەركەل دە بۇل تالاپتى ماقۇلداۋعا ءازىر. گەرمانيا كانتسلەرى ايتقانداي: «ەڭ باستىسى - ءبىرتۇتاس ەۋروپانى قۇتقارۋ قاجەت».
