وڭتۇستىكتەن 50 وتباسى سولتۇستىك قازاقستانعا كوشتى
بۇل تۋرالى ايماقتىق كوممۋنيكاتسيالار قىزمەتىندە وتكەن بريفينگتە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ءاسيا تەمىربايەۆا ءمالىم ەتتى، دەپ حابارلادى اكىمدىكتىڭ باسپا ءسوز قىزمەتى.
ونىڭ ايتۋىنشا، وڭتۇستىك قازاقستان وبلىسىندا ىشكى كوشى-قون پروتسەستەرىن رەتتەۋ جانە ەڭبەك رەسۋرستارىنىڭ تەڭگەرىمدىلىگىن ارتتىرۋ، حالىقتى بىركەلكى جايعاستىرۋ ماقساتىندا ەڭبەك كۇشى مول ايماقتان ەڭبەك كۇشى جەتىسپەيتىن رەسپۋبليكامىزدىڭ سولتۇستىك وڭىرلەرىنە ءوز ەركىمەن حالىقتى قونىستاندىرۋ جۇمىستارى جۇرگىزىلگەن.
«بۇگىنگى تاڭدا سولتۇستىك قازاقستان، شىعىس قازاقستان وبلىستارى مەن وڭتۇستىك قازاقستان وبلىسى اكىمدەرى اراسىندا ءوزارا ىنتىماقتاستىق مەموراندۋمدارى تۇزىلگەن. وبلىستا حالقى تىعىز ورنالاسقان اۋداندارمەن اقپاراتتىق ءتۇسىندىرۋ جۇمىستارى جۇرگىزىلىپ، ارنايى جۇمىس توبى قۇرىلعان ءىس-شارالار جوسپارى بەكىتىلدى. اتقارىلعان جۇمىستاردىڭ ناتيجەسىندە، 50 وتباسى حالقى تىعىز اۋدانداردان سولتۇستىك قازاقستان وبلىسىنا قونىس اۋداردى»، - دەدى باسقارما باسشىسى.
باسپا ءسوز ءماسليحاتىنا قاتىسقان سولتۇستىك قازاقستان، پاۆلودار، شىعىس قازاقستان، قوستاناي وبلىستارىنىڭ وكىلدەرى وڭتۇستىكتەگى حالقى تىعىز ورنالاسقان وبلىسىمىزدىڭ سارى اعاش، ماقتارال اۋداندارى مەن شىمكەنت قالاسىندا 27-29- ءساۋىر ارالىعىندا بوس جۇمىس ورىندار جارمەڭكەلەرى مەن «سەرپىن» باعدارلاماسى اياسىندا جاستارمەن كەزدەسۋلەر ۇيىمداستىرىلعانىن ايتتى.
اتقارىلعان ءىس-شارالار نەگىزىندە جالپى 3 مىڭعا جۋىق ادام جارمەڭكەگە قاتىسىپ، 906 وتباسى كوشۋگە نيەت ءبىلدىردى.
كەزدەسۋ سوڭىندا ەلىمىزدىڭ سولتۇستىك قازاقستان وبلىسىنا كوشۋگە نيەتتى 16 وتباسىن (وتباسى مۇشەسى - 38 ادام) سالتاناتتى تۇردە شىعارىپ سالۋ ءراسىمىن وتكىزۋ كوزدەلىپ جاتقانى بەلگىلى بولدى.
بۇل جۇمىستار جىل سوڭىنا دەيىن جالعاساتىن بولادى.
