شوتلانديا ارالىندا 50 جىلدا ءبىرىنشى رەت ۇرلىق جاسالدى
Еpochtimes.ru باسىلىمىنىڭ مالىمەتىنشە، كاننا ارالىنىڭ جاعالاۋىندا جارتى عاسىردا بولماعان ۇرلىق جاسالدى. بەلگىسىز بىرەۋلەر مۇنداعى دۇكەننەن تاتتىلەر مەن جۇننەن جاسالعان 6 شلياپانى جىمقىرىپ كەتىپتى.
«ءبىر وكىنىشتىسى، شلياپانىڭ ءارقايسىسى قولدان جاسالىپ، ساتۋعا ەندى عانا قويىلعان. توناۋشىلار دۇكەنگە ەسىكتى اشىپ، كەدەرگىسىز كىرگەن. سەبەبى ونىڭ يەسى دۇكەن ەسىگىن ەشقاشان قۇلىپتامايدى. ارال تۇرعىندارىنىڭ ءبىر-بىرىنە سەنگەندىگى سونشالىق، ءتىپتى مۇندا جەرگىلىكتى بالىقشىلار ەمىن-ەركىن كىرەتىن بولعان. ولار عالامتور جەلىسىن پايدالانىپ، دۇكەننەن كەرەك-جاراقتارىن ءوز بەتىنشە الىپ، تاۋاردىڭ اقشاسىن ارنايى جاشىككە سالىپ كەتىپ وتىرعان»، - دەپ جازادى باسىلىم.
ايتا كەتەيىك، بۇل ارالدا سوڭعى جارتى عاسىردا بىردە ءبىر رەت ۇرلىق بولماعان. ال وسىعان دەيىن سوڭعى رەت 60 جىلدارى عانا شىركەۋدەن اعاش تارەلكە ۇرلانىپتى. جالپى كاننا ارالى ىشكى گەبريد ارالدارىنىڭ ارحيپەلاگىندا ورنالاسقان. مۇندا بارلىعى 30 ادام تۇرادى.
